Словак улсад нэгэн эрэгтэй ойд зугаалж яваад, баавгайд бариулж, амиа алдсан байна. Үүний дараа тус улсын Засгийн газар 350 хүрэн баавгайг буудаж, устгах төлөвлөгөө баталсан байна.

Өнгөрсөн ням гарагт тус улсын төвийн хэсгийн Детва хэмээх суурингийн ойролцоох ойгоос баавгайд бариулж амиа алдсан 59 настай эрэгтэйн цогцос олдсонтой холбогдуулан, Засгийн газар дээрх шийдвэрийг лхагва гарагт гаргалаа. Словак улсын Ерөнхий сайд Роберт Фицогийн тэргүүлсэн популист-үндсэрхэг үзэлт Засгийн газрын хуралдаанаар тус улсын 1300 гаруй хүрэн баавгайн 25% буюу 350 баавгайг буудаж, устгахаар болжээ.

Ерөнхий сайд Р.Фицо хуралдааны дараа сэтгүүлчдэд хийсэн мэдэгдэлдээ “Бид иргэд нь ойд алхаж, зугаалахаасаа айж эмээдэг улсад амьдарч чадахгүй” гэжээ. Төлөвлөгөөний дагуу тус улсын засаг захиргааны нийт 79 нэгжийн 55-д нь хүрэн баавгайг буудаж устгах боломж олгох зорилгоор тусгай онц байдал зарлаад байна.

Үүний өмнө тус улсын Засгийн газар суурьшмал бүсэд ойртож ирсэн баавгайг буудах зөвшөөрлийг иргэдэд олгоод байсан бөгөөд 2024 оны сүүлийн үеийн байдлаар нийт 93 баавгайг буудсан гэх тоон мэдээллийг өгч байжээ.

Харин байгаль хамгаалагчид Засгийн газрын дээрх шийдвэрийг эсэргүүцэж, “Олон улсын өмнө хүлээсэн үүргээ зөрчсөн, хууль бус шийдвэр” хэмээн буруушаагаад байна. Словакийн сөрөг хүчний Прогрессив Словак намын гишүүн, экологич Михал Вижек Засгийн газрын шийдвэрийг “Ямар ч утгагүй” хэмээн шүүмжилж, “Байгаль орчны яам баавгайн тоо толгойн өсөлтийг хязгаарлаж чадаагүйн улмаас хамгаалагдсан амьтны төрөл зүйлийг устгалд оруулахаар боллоо” гэж буруутгаад, “Европын Комисс Засгийн газрын шийдвэрийг зогсооно” гэж найдаж байгаагаа хэлсэн байна.

Сүүлийн жилүүдэд баавгай хүн рүү дайрч, аминд нь хүрсэн хэд хэдэн тохиолдол гарсан нь Словак улсад ийнхүү улс төрийн томоохон сэдэв болж хувираад байгаа ажээ.