“Ногоон автобусны” гэх тодотголтой хэрэгт холбогдсон А.Ганхуяг нарын 24 хүний гэм бурууг шүүх хурал 2025.02.14-нөөс эхлэн 20 гаруй хоног үргэлжилж, өчигдөр завсарлалаа. Уг хэргийг шүүсэн бүрэлдэхүүн одоо зөвлөлдөж, нэгдсэн шийдвэр гарган, ирэх долоо хоногт танилцуулахаар болжээ.

Улаанабатар хотын нийтийн тээврийн паркийг шинэчлэхээр 2023 онд нийслэлийн Засаг даргын Тамгын газар, “Тэнүүн-Огоо” ХХК худалдан авах гэрээ байгуулж, их багтаамжийн дизель хөдөлгүүртэй 600 автобус, цахилгаан хөдөлгүүртэй 160 автобус, дунд багтаамжийн 50 автобус, нийт 810 автобус худалдан авахаар тохирсон юм. Гэвч “Тэнүүн-Огоо” компанийн хамгийн түрүүнд оруулж ирсэн 100 ногоон автобус хуучин байсан юм. Тэдгээр автобусыг Авто тээврийн үндэсний төвөөр шалгуулахад, 99 нь техникийн үзлэгт тэнцээгүй.

Ийн эл асуудал Авлигатай тэмцэх газар шилжиж, одоо Чингэлтэй дүүргийн Эрүүгийн хэргийн анхан шатны шүүхэд уг хэргийг хянан хэлэлцэж байна.