АТГ-ын даргын томилгоог УИХ-аар хэлэлцүүлэх явцад гишүүдийн зүгээс ашиг сонирхлын зөрчилтэй авлигатай холбоотой байж мэдэх мэдээллийг нэр дэвшигч З.Дашдаваагаас тодруулж, анхаарч ажиллахыг хүслээ. Тэр дунд хамгийн ноцтой байж мэдэх мэдээллийг УИХ-ын гишүүн Б.Энхбаяр өгсөн нь Сангийн сайдтай холбоотой мэдээлэл байсан юм. Ингээд УИХ-ын гишүүн Б.Энхбаяраас тодрууллаа.

-Шүүхийн шийдвэр гүйцэтгэх газрын амралтад байна гэсэн. Энэ талаар тодруулахгүй юу?

-Өчигдөр би тодорхой хэлсэн дээ. Төр хурахын амралтын газарт гэж.

-Мөнгө барьдаг сайд гэж та хэнийг хэлж байгаа юм бол?

-Мөнгө барьдаг сайд чинь Монголд ганцхан байдаг шүү дээ.

-Сангийн сайдыг хэлж байгаа юм уу?

-Дарханы хүн гээ биз дээ. Би тэгээд АТГ-ын даргад нь хэллээ шүү дээ. Эзнийг нь шалга гээд. Тэр хүнийг амраагаад байна гэдэг чинь шагнаад байна гэсэн үг биз дээ.

-Та энэ мэдээллээ хаанаас авсан бэ?

-Мэдээллийн эх сурвалжаа нууцлах эрх байдаг биз дээ?

-Та төрийн хариуцлагатай алба хашиж байгаа хүн учраас тодорхой мэдээлэл өгөх ёстой биз дээ?

-Тэр амралтад амарч байгаа хүмүүсээс зурагтаар сэйфнээсээ мөнгө гаргаад байсан хүн чинь энд амраад байна шүү дээ гээд ярьж байна шүү дээ. Хүмүүс ярьж байна. Даварчихсан байгаа биз дээ?

-Та АТГ-т хандсан юм уу? Эсвэл цагдаагийн байгууллагад хандсан уу? Шүүхээс ял шийтгэл авсан хүн амралтын газарт байж болохгүй биз дээ?

-Шүүхийн шийдвэр гүйцэтгэх газрынхан хийгээд байна шүү дээ. Тус газар тэр хүнийг амралтад байлгасан байна. Ингээд бодохоор ШШГЕГ-ын төсвийг 2025 онд хэн нэмчхэв? Сангийн сайд маань гэнэт л ШШГЕГ-т их хайртай болчихсон шүү дээ. Төсөв мөсвийг нь аягүй сайн нэмж өгөөд л.

-Та тэгвэл холбоотой гэж хардаж байна гэсэн үг үү?

-Ойлгомжтой байгаа биз дээ?

-За баярлалаа.