ЗГХЭГ-ын дарга Н.Учрал Засгийн газрын ээлжит хуралдаанаас гарсан шийдвэрийг танилцуулах үеэр “Төгрөг нуурын ордыг гадаадын иргэдэд 250 сая доллароор зарсан хүн бол Монгол Улсын Ерөнхийлөгч асан Х.Баттулга” гэж мэдэгдсэн. Энэ тухай Улсын их хурлын гишүүн Л.Мөнхбаясгалангаас сэтгүүлчид тодрууллаа.

–Та Төгрөг нуурын ордтой холбоотой байр сууриа тодорхой илэрхийлээч ?

-УИХ-ын нэр бүхий гишүүд нэгдэж, Монгол Улсаа тойрч явсан. Стратегийн ордуудыг төрд буцаан авах, 2007 оны УИХ-ын 27-р тогтоол болон Үндэсний баялгийн сангийн тухай хуулийн хэрэгжилтийг хангах ёстой гэж бид 21 аймаар тойрч явсан. Хэрвээ Төгрөг нуурын орд Баттулга гишүүнийх байсан бол “Өөрийнхөө ордыг ард түмэнд өгье өө” гээд Монгол Улсаа тойрч байгаа хүнийг тэнэг гэж тооцох уу эсвэл шударга гэж тооцох юм уу?

–Өчигдөр ЗГХЭГ-ын дарга нэлээн ноцтой мэдэгдэл хийчихлээ шүү дээ. Уг мэдэгдлийн дараа та бүхэн нам дээрээ энэ асуудлыг ярилцсан уу?

-Бид нам дээр энэ асуудлыг яриагүй. Авлигатай тэмцэх газрын даргын асуудлыг яриад л бүлгийн хурал тарсан. Харин хувь гишүүний байр суурь бол ийм байна. Х.Баттулга гэдэг хүнийг миний мэдэхээр 15 жил шалгаж байгаа. Энэ бол зүгээр л 16 дахь жилийн үйл явдал гэж би харж байна.

–Хариуцлагатай албан тушаалтан олон нийтийн мэдээллийн хэрэгслээр ийм мэдэгдэл хийлээ шүү дээ. Та энэ тухай Х.Баттулга гишүүнээс өөрөөс нь асуусан уу ?

-Би хэлээд байна шүү дээ. Энэ хүнийг 15 жил шалгасан. Нэр бүхий бизнесмэний эхнэр хаяад явахад хүртэл “Баттулга гишүүнээс л боллоо” гэдэг. Би бол нэг их асуудал гэж үзэхгүй байна. Өөрөөс нь асуусан. Х.Баттулга гишүүн “Хэрвээ надад ийм орд байсан бол би наад ордыг чинь улсын мэдэлд авах ёстой гээд 21 аймаг тойрохгүй байлгүй дээ” гэж байна лээ. Хуулийн байгууллагад шалгуулахаа мэдэгдсэн.

–Та Төгрөг нуурын ордтой Х.Баттулга гишүүн ямар ч хамааралгүй гэж хэлж байна уу ?

-Би хамааралгүй гэж хэлээгүй. Засгийн газрын гишүүнд баримт нь байгаа бол өөрөө хуулийн байгууллагаар явах нь зүйн хэрэг. Би Учрал сайдын баримтыг мэдэхгүй. Тэр хүнийг буруутгах эсвэл дэмжих асуудал надад үгүй. Намайг Мөнхбаясгалан гэж таньж байгаа биз дээ. Би Баттулга биш, Мөнхбаясгалан байна.