Аймгийн арслан Г.Мөнхбаяр, сумын заан Д.Оргилох тэргүүтэй 13 бөхөөс сэргээш илэрчээ.
Допингийн эсрэг үндэсний дүрмийн дагуу үндэсний бөхийн тамирчдад сэргээш хэрэглүүлэхгүй байх зорилгоор сэргээшийн шинжилгээ хийдэг. Тэмцээний болон тэмцээний бус үед бөхчүүдээс биологийн сорьц цуглуулан авч, Дэлхийн допингийн эсрэг агентлагийн итгэмжлэгдсэн ХБНГУ, БНСУ, Швейцар улсын лабораторид хүргүүлэн шинжлүүлжээ.

Допингийн эсрэг үндэсний дүрмийн дагуу Монголын допингийн эсрэг үндэсний байгууллага сэргээшийн шинжилгээний үр дүн, зөрчил, авсан арга хэмжээний талаар олон нийтэд мэдээлэх үүрэгтэй юм.
Үүнд:

• Шинжилгээний үр дүн
• Сэргээш хэрэглэсэн тамирчин болон холбогдох этгээдийн мэдээлэл
• Илэрсэн хориотой бодис, хориотой арга
• Тухайн тамирчинд оноосон шийтгэл болон түр түдгэлзүүлсэн хугацаа

Сэргээшийн шинжилгээгээр зөрчил илэрсэн тамирчдын дараах эрхийг дүрмийн дагуу хангадаг юм байна. Үүнд:

• Лабораторийн шинжилгээний хуудас, А сорьцын баримт бичгийн багцыг нэмэлтээр авах
• В сорьцыг шинжлүүлэх
• Тайлбар өгөх
• Допингийн Эсрэг Үндэсний Дүрмийн хүрээнд хамтран ажиллах нөхцөл бүрдүүлэх

Монгол Улсад допингийн эсрэг олон улсын жишигт нийцсэн хяналт, шалгалтыг хэрэгжүүлж, үндэсний бөхийн нэр хүндийг хамгаалах, шударга өрсөлдөөнийг дэмжих бодлогыг баримтлан ажиллаж байна.
Допингийн эсрэг хяналт, үр дүнгийн талаарх мэдээллийг олон нийтэд тухай бүрд нь хүргэн ажиллах болно гэж Монголын Допингийн Эсрэг Үндэсний Байгууллагаас мэдээллээ.