АНЭУ-ын Аль-Айн хотод шатрын насанд хүрэгчдийн Ази тивийн аварга шалгаруулах тэмцээн энэ сарын 6-16-ны хооронд болно. Энэ удаагийн Азийн аваргад 34 орны нийт 262 тамирчин оролцохоор мэдүүлгээ өгчээ.

Тэгвэл манай улсаас Үндэсний шигшээ багийн дасгалжуулагч С.Билгүүн, С.Ган-Од нарын удирдлага дор Үндэсний шигшээ багаас эмэгтэйчүүдийн ангилалд Их мастер Б.Мөнгөнтуул (гавьяат тамирчин), Т.Мөнхзул, Ү.Үүрийнтуяа, ФИДЕ дэд мастер Б.Мөнгөнзул, эрэгтэйчүүдэд Олон улсын мастер С.Ган-Эрдэнэ, Г.Амартүвшин, ФИДЕ мастер Н.Содбилэгт нар оюун ухаанаа сорин өрсөлдөнө.

Шигшээ багийн бус тамирчдаас дурдвал, эмэгтэйчүүдийн ангилалд их мастер Д.Номин-Эрдэнэ, ФИДЕ мастер Э.Энхрий, ФИДЕ дэд мастер Э.Эмүжин, Б.Буянхишиг, Ч.Нандинжигүүр, Х.Баясгалан, залуу тамирчин З.Нарансолонго, З.Наранзаяа, эрэгтэйчүүдэд ФИДЕ мастер С.Чингүүн, Г.Мөнхбаяр нар өрсөлдөхөөр бэлтгэл сургуулилтаа хангаж байна.

Тус тэмцээнд шатрын спортоор дэлхийд тэргүүлэгч Энэтхэг, БНХАУ, ОХУ (ОХУ Азийн шатрын холбоонд элссэн)-ын шатарчид оролцох тул өмнөх жилүүдээс илүү өрсөлдөөнтэй болох төлөвтэй байна. Дэлхийн цомын эрх олгох тус тэмцээнд Их мастер 53, эмэгтэй их мастер 19, Олон улсын цолтой 228 шатарчин бүртгүүлсэн байгаагаас энэ тэмцээний чансааг дүгнэж болох юм.

Монголын шатарчид тус тэмцээнээс нийт хоёр хүрэл медальтай бөгөөд 2019 онд Т.Мөнхзул, 2023 онд Б.Мөнгөнтуул нар медалийн тавцанд гарч байсан билээ.