Английн One Direction хамтлагийн хуучин гишүүн, дуучин Liam Payne Аргентины нийслэл Буэнос-Айрес хотноо амарч байхдаа өндрөөс унаж, амиа алджээ. Тэрээр 31 насандаа ийнхүү хорвоогийн мөнх бусыг үзүүллээ. Хотын цагдаагийн газраас гаргасан мэдэгдэлд түүнийг 10 сарын 16-ны лхагва гаригт Палермо дүүргийн Коста Рика гудман дахь CasaSur хэмээх зочид буудлын 3 давхарын өрөөний цонхоор унаж, амиа алдсан хэмээн мэдээлсэн байна. Мөн лхагва гаригт тухайн зочид буудалд мансууруулах бодис хэрэглэсэн эрэгтэйн талаар цагдаад дуудлага ирсэн ч тэрхүү эрэгтэй Liam Payne байсан эсэх нь тодорхойгүй байна. Дуучин Liam Payne 2010 онд бусад гишүүдийн хамтаар “One Direction” хамтлагийг байгуулж, студийн бүрэн хэмжээний 5 цомгийг гаргаж, дэлхийн хамгийн өндөр борлуулалттай хөвгүүдийн хамтлагийн нэг болж байсан түүхтэй.