УИХ төрийн болон орон нутгийн өмчит компанийн засаглалыг сайжруулахтай холбоотой төсөл хэлэлцэж буй. Энэ талаар УИХ-ын гишүүн П.Сайнзориг мэдээлэл өглөө. Тэрээр энэ төслийн анхны эхийг боловсруулсан аж.

УИХ-ын гишүүн П.Сайнзориг Төрийн болон орон нутгийн өмчит компанийн ТУЗ, гүйцэтгэх захирал, засаглалыг ил тод, төсвийн бодлоготойгоо уялдуулж, ашгийг нь ногдол ашгийн зарчмаараа төсөвт өгдөг, Баялгийн санд хуваарилдаг тогтолцоонд оруулах талаар ярилаа. Хэрэв тэгэхгүй бол улс төрийн санхүүжилт болдог, улстөрч, дарга нар луу гүйсэн хүмүүсээр ТӨХК-иуд дүүрч байгааг тэр тодотгов. Танил талаараа төрийн албанд томилогдож, ямар ч төсөл урагшлуулдаггүй, том тасалгаанд суусан, жийп унасан, пээдийсэн хүмүүсээр төрийн өмчит компаниуд дүүрсэн аж. Тиймээс энэ бүгдийг цэгцлэх цаг болсон гэнэ. Төрийн болон орон нутгийн өмчит компанийг ашиггүй ажиллуулсан дарга нар дараагийн том компанид захирлаар томилогддог асуудал бий. Тэгвэл цаашид төрийн болон орон нутгийн өмчит компанийг ашиггүй ажиллуулбал дахиж төрийн өмчит компанийн удирдлагад томилддоггүй байх хар жагсаалтыг үүсгэхээр хуулийн төсөлд тусгажээ.

“Төрийн өмчийг үнэгүйдүүлж авсан хүмүүс бүгд Төрийн ордон дотор сууж байгаа”

Мөн тэрээр “Ард түмний хөрөнгөөр баяжсан хүмүүс өнөөдөр улс төрийг залж, улс төрийн манипуляцыг хийж байгаа. Тэр хүмүүст дахиж ард түмний өмчийг үнэгүйдүүлж авах бололцоо олгож болохгүй” хэмээсэн юм.