Батлан хамгаалах яам, Соёл, спорт, аялал жуулчлал, залуучуудын яам, Монголын үндэсний музей, Монгол цэргийн музей, Дорнод аймгийн музей хамтран “Түүхэнд мөнхөрсөн хошой баатар, маршал Х.Чойбалсан 130” тусгай үзэсгэлэн Монголын үндэсний музейд гаргаж байна. Үзэсгэлэнд Монголын үндэсний музей, Монгол цэргийн музейн сан хөмрөгөөс БНМАУ-ын хошой баатар, маршал Х.Чойбалсангийн эдэлж хэрэглэж байсан иж бүрэн дүрэмт хувцас, шинель, папах малгай, савхин дээл, нөмрөг, шатар, бичгийн хэрэглэл, ширээний хонх, энгэрийн цаг, дуран, зөвлөгөөний ширээ, БНМАУ-ын баатрын үнэмлэх, буу, сэлэм зэрэг 130 биет үзмэр, 40 гаруй гэрэл зураг, нэрт уран бүтээлчдийн 10 гаруй уран зураг дэлгэжээ. Батлан хамгаалахын төв архиваас 20 орчим архивын ховор баримт зэрэг нийт 200 орчим биет үзмэр, баримт материалыг дэглэн, үзэгч олны хүртээл болгож байна.

Үзэсгэлэнг 2 дугаар сарын 8-ны өдрөөс 3 дугаар сарын 25 хүртэл олон нийтэд үнэгүй үзүүлж байна.