БНСУ-ын Дэжон хотын бага сургуулийн багш 8 настай сурагч охиныг хутгалж, хөнөөсөн аймшигтай хэрэг гарсан байна. 40 гаруй насны тэрхүү эмэгтэй багш уг охиныг хөнөөсөн гэдгээ хүлээсэн талаар Дэжон хотын Цагдаагийн газар мэдээлжээ.

Бага ангийн сурагчдыг орой бүр гэрт нь хүргэж өгдөг сургуулийн автобусны жолооч уг охиныг сургуулиас гарч ирээгүйг мэдэгдсэн байна. Ингээд түүнийг орон нутгийн цагаар даваа гаргийн 18 цагийн үед сургуулийн 2-р давхарт хутгалуулсан байхыг олжээ. Түүнийг эмнэлэгт хүргэсэн ч амьсгал хураасан байна.

Багш уг охины дэргэд мэсний шарх авсан байдалтай байсан аж. Түүнийг амиа егүүтгэхийг оролдсон байж магадгүй хэмээн Цагдаагийн газар үзэж байна.

БНСУ-ын ерөнхийлөгч Чой Сан Мок мягмар гарагт уг хэргийг сайтар мөрдөн шалгахыг үүрэгдэж, ийм гэмт хэрэг дахиж гаргахгүй байх тал дээр шаардлагатай арга хэмжээг авахыг эрх баригчдад уриалжээ. Уг хэргийн улмаас мягмар гарагт тухайн сургуулийн үйл ажиллагааг зогсоосон бол сургуулийн гадна, үүд хэсэгт сурагч охины дурсгалыг хүндэтгэж цэцэг, хүүхэлдэй, тоглоом зэргийг хүмүүс тавьсан байна.

Сурагчаа хутгалж хөнөөсөн багш 2024 оны 12-р сарын 9-ний өдөр депрессийн улмаас хагас жилийн чөлөө авсан ч 20 хоногийн дараа эмчийн зөвшөөрлийн дагуу ажилдаа эргэн орсон байжээ. Уг хэрэг гарахаас хэд хоногийн өмнө тэрхүү багш сургууль дээр хэрцгий авир гаргаж, өөр нэгэн багшийн хоолойг боосон байна. Зохисгүй зан авир, үйлдэл гаргаж байсан учраас түүнийг хичээлийн эрхлэгчийн хажууд суулган, үргэлж хараа хяналтад байлгаж байсан аж. Тэр ажилдаа орсноос хойш нэг ч ангид хичээл ороогүй байжээ.

Эрх баригчид тухайн багшийг амиа алдсан сурагч охинтой ямар нэгэн харилцаа холбоотой байгаагүй гэж мэдэгдсэн байна. Тухайн багшийг мэс засалд оруулжээ. Бие нь дээрдсэний дараа түүнийг байцаана гэдгээ Дэжон хотын Цагдаагийн газар мэдэгджээ.