Японы Хоккайдо мужийн Саппоро хотноо жил бүр уламжлал болгон зохион байгуулдаг цасны баярт Монголын цасан урлаачид оролцож, тэргүүн байр эзэллээ. Монголын уран сийлбэрч Б.Содномдаржаа, А.Батзориг, Б.Ганбаатар нар “Амьдрал” нэртэй бүтээлээр 9 улсын багтай өрсөлдсөн байна.

Тэд “Хун шувуу хайрын бэлгэдэл болсон нь” үлгэрээс сэдэвлэн, өөд өөдөөсөө харан сууж, амьдралаа босгохоор хичээж буй монгол хосыг цасаар урлажээ. Хосын алган дээр амьдралыг төлөөлүүлэн мод ургуулж, монгол үндэсний хувцсан дээр нь эртний монголчуудын шүтээн амьтдыг дүрсэлсэн байна. Монголчуудын өв соёлыг цасан баримлаар илэрхийлж, амьдралын мөн чанарыг гүн гүнзгий өгүүлсэн хэмээн шүүгчид уг бүтээлийг өндрөөр үнэлсэн байна.

Саппорогийн цасны баярт Монголын сийлбэрчид 3 дахь жилдээ оролцож байгаа юм. Манай урлаачид 2024 онд “Хамгаалагч” бүтээлээрээ түрүүлсэн юм. Монголчуудыг энэ тэмцээнд оролцож эхэлснээр 2018, 2019, 2023 оны аварга Тайландын баг аваргын титмээ алдаж, 2024, 2025 онд дараалан 2 дугаар баaр эзэлжээ.

1974 оноос хойш энэ хот цасан баримлын олон улсын тэмцээн зохион байгуулж байна. Өнөө жил 74 дэх удаагаа болсон энэ баяр 2 дугаар сарын 4-11-нд Саппоро хотын 3 байршилд боллоо. Энд цас, мөсөөр хийсэн 190 орчим бүтээл дэлгэсний заримыг нь нутгийн иргэд урласан байна.  

Цасны баярын гол үйл ажиллагааг хотын төвийн Одори цэцэрлэгт хүрээлэнд зохион байгуулав. Японы хойд нутгийн уугуул иргэд болох айнүчүүдийн тухай “Golden Kamuy” хэмээх анимэ цувралын дүрүүдийг харуулсан 12 метр өндөр цасан баримлыг энд байрлуулжээ. Ковидоос үүдэлтэй цар тахал дэгдэхээс өмнө энэ баярыг жил бүр 2 сая гаруй хүн үздэг байсан юм. Харин 2021, 2022 онд цар тахлын улмаас наадмыг цахимаар хийсэн бол 2023 онд цомхон зохион байгуулжээ.