Сар шинийн баяр ойртож байгаа энэ өдрүүдэд иргэд гарал үүсэл нь тодорхойгүй, хаяг шошгын зөрчилтэй архи, согтууруулах ундааг хилээр нэвтрүүлэхийг завдах нь олширчээ.

Энэ талаар ГЕГ-ын Гаалийн хяналт, бүрдүүлэлтийн газрын улсын байцаагч Л.Амартүвшингээс тодруулахад “Баяр ёслол дөхөх үеэр иргэд хуурамч, дуураймал архи, согтууруулах ундааг Монгол Улсын хилээр нэвтрүүлэх зөрчил их гаргаж байна. 2025 он гарснаас хойш ойролцоогоор 540 литр хуурамч архи, согтрууруулах ундаа хурааж авсан. Шалгалт үргэлжилж байна.

Иймд иргэдийг хэрэглэж буй бүтээгдэхүүндээ анхаарал, болгоомжтой хандахыг хүсье. Албан ёсны зөвшөөрөлтэй оруулж ирсэн архинд онцгой албан татвар төлсөн код наасан байгаа. Энэхүү кодыг уншуулахад тухайн архийг үйлдвэрлэгч улс, аж ахуйн нэгжийн мэдээлэл гарч ирнэ. Ийм аргаар чанарын шаардлага хангасан архи, согтууруулах ундаа мөн гэдгийг тодорхойлох бүрэн боломжтой” гэлээ.