Дундговь аймгийн Сайхан-Овоо сумын Найз багийн Сүүж гэдэг газар /аймгийн төвөөс баруун зүгт 179 км, сумын төвөөс зүүн хойд зүгт 49 км/ өчигдөр орой 17:00:45 цагт газар 4.6 магнитудын хүчтэй хөдөлсөн тухай time.mn мэдээлсэн. ОБЕГ-аас тус аймгийн Онцгой байдлын газраар дамжуулан, Сайхан-Овоо сумын Засаг даргын Тамгын газар, Найз багийн засаг дарга нараас уг чичирхийллийн талаар тодруулахад, хүчтэй чичирхийлэл мэдрэгдсэн байв. Тухайн газар нутагладаг малчид “Дүнгэнэх чимээ гарч, гэр, эд хогшил хөдөлсөн” гэж ярьжээ. Дундговь аймгийн Эрдэнэдалай сум, Өвөрхангай аймгийн Арвайхээр, Баянгол, Тарагт, Хайрхандулаан, Уянга сумдад уг чичирхийлэл мэдрэгдсэн байлаа. Гэсэн ч 20:10 цагийн байдлаар учирсан хохирол үгүй байв.