“М-Си-Эс групп” компанийн Хуулийн хэлтсийн дарга З.Төрмандахыг Дүүргийн Эрүү, иргэний хэргийн хялбар ажиллагааны анхан шатны тойргийн шүүхийн шийдвэрээр цагдан хориод буй. Нийслэлийн Прокурорын газар З.Төрмандахыг “Төрийн нууцад хамаарах мэдээ, баримт, эд зүйлсийг хулгайлсан, цуглуулсан, хадгалсан”, “Гүйцэтгэх ажил явуулах эрхгүй этгээд гүйцэтгэх ажил явуулсан, эсхүл гүйцэтгэх ажлын тусгай техник олж авсан, ашигласан, борлуулсан” гэмт хэрэгт холбогдуулан, энэ сарын 19-нд яллагдагчаар татан, шалгаж эхэлсэн юм.
Түүнийг гэмт хэргийн ул мөр, эд мөрийн баримт, нотлох баримтыг устгах, өөрчлөх, зөөвөрлөх, нуун далдлах, үрэгдүүлэх, хуурамчаар үйлдэх, гэмт хэрэг үйлдэх, гэмт хэргээ төгсгөх үндэслэл бүхий баримт, мэдээлэл байгаа… гэх үндэслэлээр цагдан хорихоор улсын яллагч тус шүүхэд ханджээ. Шүүх уг саналыг 2 дугаар сарын 19-ний өдөр хүлээн авч, хэргийн материалд цугларсан нотлох баримтууд, шүүхийн хэлэлцүүлэгт гаргасан прокурорын санал, яллагдагчийн өмгөөлөгч нарын тайлбар зэрэгтэй танилцан, яллагдагч З.Төрмандахад яллагдагчаар цагдан хорих таслан сэргийлэх арга хэмжээ авах тухай прокурорын саналыг хүлээн авчээ.

Хууль зүй, дотоод хэргийн сайд О.Алтангэрэл энэ талаар “Нэр бүхий хүмүүс саатуулагдсан нь үнэн. Монгол Улсын төр, хууль хяналтын байгууллагууд хуульд заасан үндэслэлийн дагуу гүйцэтгэх ажиллагаа буюу тусгай ажиллагаа явуулдаг. Энэ нь монгол хүний эрх, эрх чөлөөг хамгаалах, монгол төр, үндэсний аюулгүй байдлыг хамгаалах зорилготой байдаг. Гэтэл хувийн аж ахуй нэгж, хууль бусаар гүйцэтгэх ажиллагаа явуулсан, төрийн нууцыг хууль бусаар олж авсан. Өөрөөр хэлбэл, хувийн аж ахуй нэгж дэргэдээ тусгай байгууллагатай байсан зүйлүүд яригдаж байна. Энэ асуудалд сэжиглэгдсэн тодорхой этгээдүүдийг саатуулж, шалгагдаж байна.Монгол Улсад ямар ч мөнгөтэй, том байлаа гээд хувийн аж ахуйн нэгж гүйцэтгэх ажиллагаа явуулж болохгүй. Төрийн нууц хуулиар хамгаалагдана. Хэн ч монгол төрийн хуулийн дээгүүр гарч, гүйцэтгэх ажиллагаа явуулж болохгүй. Гүйцэтгэх ажлын тусгай техник хэрэгсэл ашиглаж болохгүй. Энэ зарчмын хүрээнд мөрдөн шалгах үйл ажиллагаа явуулж байна. Төрийн нууц, мөрдөн байцаалтын нууцтай холбоотой асуудлыг дэлгэрэнгүй ярих боломжгүй” гэж тайлбарласан юм.