УИХ-ын гишүүн Д.Цогтбаатарыг гэмт буруутайд тооцсон шүүхийн шийдвэрийг дээд шүүхээс хэвээр үлдээсэн. Шүүхээс гэм буруутайг нь тогтоочихсон этгээд хууль батлалцаад явсаар байх уу гэдэг асуулт нийгэмд үүсээд байна. Энэ талаар УИХ-ын Ёс зүй, дэгийн байнгын хорооны дарга Б.Баярбаатараас тодрууллаа.

–Д.Цогтбаатар гишүүнийг эргүүлэн татах асуудал хэзээ Парламентын түвшинд яригдах вэ?

-УИХ-ын гишүүн өөрөө өргөдлөө өгсөн тохиолдолд бид чөлөөлнө, өөрөөр бол  нас барсан тохиолдолд эсвэл гэмт хэрэгт холбогдсон нь шүүхээр тогтоогдсон бол түдгэлзүүлэх эргүүлэн татах асуудал ярих учиртай. Гэхдээ Улсын дээд шүүхийн шийдвэрийг хэлэлцэх үндэслэл парламентад байхгүй. Даваагийн Цогтбаатар гишүүнийг эргүүлэн татах уу эс татах уу гэдэг асуудлыг ч бид хэлэлцэхгүй. Парламентаар хэлэлцэх ганцхан үндэслэл байгаа нь тогтоолыг л редакцын засвар хийж хэлэлцэх үндэслэл л бий. Энэ үг үсгийг ингэх үү гэдэг ч юм уу. Хууль зүйн үндэслэлийн хувьд УИХ-д өнөөдөр ийм л эрх байна. Бусад тохиолдолд дээрх асуудлыг парламент Даваагийн Цогтбаатар гишүүний асуудлыг хэлэлцэх үндэслэл алга. Хэрвээ парламентаар энэ асуудал орж ирвэл би хувь гишүүнийхээ хувиар уг хэлэлцүүлэгт оролцохгүй. Учир нь дээрх асуудал үндсэн хуулийн зөрчил үүсгэсэн асуудал. Хоёрдугаарт Даваагийн Цогтбаатар гишүүнийг буруутай юу гэдгийг Дээд шүүх шүүхгүй. Субьектив шийдвэр гаргахгүй гэсэн үг. Нэг ёсондоо анхан болон давж заалдах шатны шүүх хурлын зөв шийдэж үү үгүй юу гэдгийг л хянадаг. Хяналтын шатны шүүх. Тэгвэл анхан шатны шүүх, давж заалдах шатны шүүхийн шийдвэр хэзээ гарсан юм, яаж гарсан юм, шүүхийн шийдвэрүүд сонгуулийн өмнө болсон уу хойно болсон уу гээд судалж үзэх шаардлагатай зүйл их бий. Дээр нь УИХ-ын тухай хуулийн 9.1.5, Үндсэн хуулийн 29 дүгээр зүйлийн зөрчил ахиад өөр Үндсэн хуулийн ямар ямар зүйл заалтуудтай зөрчилдөж байна гэдгийг судлах шаардлага үүсээд байна.

–Их хурал дээр гишүүн гэмт хэрэгт холбогдсон нь нотлогдчихоод байхад хэлэлцэх хууль эрх зүйн орчин байхгүй гэсэн үг үү?

-Хуулийн дагуу хэлэлцэх заалт нь Үндсэн хууль зөрчөөд байна. УИХ-ын гишүүнийг эргүүлэн татах процесс нь өөрөө үндсэн хууль зөрчөөд байгаа юм.

-Хуулийн цоорхой ашиглаад гэмт хэрэгтэн хууль батлалцаад суух гэж үү?

-Би УИХ-ыг төлөөлж хариулт өгөх боломжгүй. Магадгүй асуудлыг Үндсэн хуулийн цэцэд тавих л гарц байж болох юм.

–Э.Болормаа гишүүнийг мөн гадаадын хөрөнгө оруулалттай компаниас мөнгө авсан байх магадлалтай гэдэг асуудал яригдаж байна?

-Э.Болормаа гишүүний асуудал албан ёсоор орж ирээгүй. Миний сонссоноор хэсэг хүн гомдол гаргаад ҮАГ-т хандсан тухай мэдээлэл бий. Та бүхний нэгэн адил хэвлэлээр яригдсан хэмжээнд л мэдээлэлтэй байна. Э.Болормаа гишүүнийг би энэ талаараа тодруулга өгөөрэй гэж хэлсэн.  Тэгээд ч хүний гэм буруутай эсэхийг Шүүх л тогтоодог учраас бид энд зөв буруу гэж ярих үндэслэл байхгүй.

–Чуулганы хуралдаанаа тасалсан олон гишүүн байна. Ямар хариуцлага тооцох вэ?

-С.Лүндэг гишүүний ирц дутуу ч гэсэн хариуцлага тооцох хэмжээнд хүрээгүй. Харин Халтмаагийн Баттулга гишүүний ирц хангалтгүй учраас хариуцлага хүлээлгэж таарна.

–Ямар хариуцлага тооцох вэ?

-Хуулийн дагуу сануулах эсвэл уучлал гуйлгуулах эсвэл цалингаас хасах хариуцлага тооцно.