2024 онд улаанбурхан өвчний Европт бүртгэгдсэн тохиолдлын тоо сүүлийн 25 жилийн хамгийн өндөр үзүүлэлт болсныг Дэлхийн эрүүл мэндийн байгууллага болон НҮБ-ын Хүүхдийн сангийн хамтран явуулсан судалгааны дүн харуулжээ.
Нийт 53 улс орныг хамарсан ДЭМБ/ЮНИСЕФ-ийн хамтарсан дээрх судалгааны тайланд дурдсанаар 2024 онд Европын бүс нутагт улаанбурхан өвчний 127,350 тохиолдол бүртгэгдсэн нь 1997 оноос хойшхи хамгийн өндөр тоон үзүүлэлт болсныг онцолсон байна. Түүнчлэн 2025 оны 3 сарын 6 хүртэлх байдлаар улаанбурхан өвчнөөр нас барсан нийт 38 тохиолдол бүртгэгдээд байгаа ажээ.
Хамтарсан судалгааны тайланд өнгөрсөн жил улаанбурхан өвчний тохиолдлын тоо хэмжээ өмнөх жилтэй харьцуулахад хоёр дахин нэмэгдсэн ба Европ болон Төв Азийн бүсэд бүртгэгдсэн нийт тохиолдлын 40 гаруй хувь нь 5-аас доош насны хүүхдүүд байсныг онцолсон байна.
2024 онд дэлхийн хэмжээнд бүртгэгдсэн нийт улаанбурхан өвчний тохиолдлын 30 гаруй хувь Европын бүс нутагт бүртгэгдэж, Европын бүсийн хэмжээнд Румын улсад хамгийн их буюу 30,692 тохиолдол бүртгэгдсэн бол 28,147 тохиолдол бүртгэгдсэн Казахстан улс удаалжээ.
Улаанбурхан өвчний халдварын тоо хэмжээ ингэж огцом өсөн нэмэгдэх болсон шалтгааныг вакцинжуулалтын хэмжээ буурсантай холбон тайлбарласан байна. Жишээ нь, өнгөрсөн жил Европт бүртгэгдсэн 10 тохиолдол тутмын 8 нь вакцинжуулалтад хамрагдаагүй гэсэн тоо баримтыг Европын халдварт өвчний хяналт, урьдчилан сэргийлэх төвөөс мэдээлжээ. Мөн тус төвөөс 2023 оны байдлаар улаанбурхан өвчний халдварыг тогтоон барихад шаардлагатай 95%-ийн вакцинжуулалтын хэмжээнд Унгар, Мальта, Португал, Словак гэсэн ердөө 4-хөн улс Европт хүрсэн болохыг онцолсон байна.
“Улаанбурхан өвчний халдвар томоохон асуудал болж хувираад байна, вакцинжуулалтын хэмжээг нэмэгдүүлэхгүй бол эрүүл мэндийн аюулгүй байдал гэж үгүй болно” хэмээн ДЭМБ-ын Европын бүс нутгийг хариуцсан албаны дарга Ханс Анри Клюге хэлсэн байна.
Улаанбурхан өвчин нь ханиах, найтаах зэрэг агаар дуслын замаар халдварладаг бөгөөд улаанбурханы эсрэг MMR вакцин нь уг өвчний вирусын эсрэг 97%-ийн идэвхитэй тэмцдэг ажээ. Харин улаанбурхан туссан хүнд өндөр халуурах, нүд улайж, нулимс гоожих, ханиаж найтаах шинж тэмдгүүд илэрдэг байна. Улаанбурхан өвчний вирус мөн уушгины хатгалгаа, тархины хаван болон үхэлд ч хүргэх аюултай юм.