Хувцас загварын “Forever 21” брэндийн үйл ажиллагааг эрхлэн удирдан явуулдаг компанийн зүгээс  дампуурлаас хамгаалах өргөдөл гаргаснаар тус брэнд АНУ дахь үйл ажиллагаагаа зогсоож магадгүй болжээ.

Толгой компанийн зүгээс мэдэгдэлдээ Forever 21 брэндийн дампуурлын үйл явцыг эхлүүлж байгаа ч АНУ дахь дэлгүүрүүд болон худалдааны вебсайт нь нээлттэй хэвээрээ байх болно гэжээ.

Forever 21 брэнд нэгэн үе залуу охид, бүсгүйчүүдийн дунд хамгийн эрэлттэй брэнд байсан бол цахим худалдаа, онлайн дэлгүүрүүд хүчээ авч эхэлснээс хойш хэрэглэгчдээ алдаж эхэлсэн бөгөөд тус компани анх 2019 онд дампуурлаас хамгаалах өргөдөл гаргаж, тухайн үедээ бүлэг хөрөнгө оруулагчид худалдан авч дампуурлаас аврагдаж байсан юм.

Гэвч тус компанийн санхүү хариуцсан захирал Брэд Селл мэдэгдэлдээ “Гадны түргэн загварын компаниудын өрсөлдөөн болон үнийн өсөлт, эдийн засгийн бусад сорилтууд зэргээс шалтгаалж бид цаашид тогтвортой үйл ажиллагаа явуулах боломжгүй боллоо” гэсэн байна.

Улмаар тус компани АНУ дахь бүх дэлгүүрүүд дээрээ агуулах чөлөөлөх худалдаа явуулж, мөн шүүхийн зөвлөмж, хяналтан доор компанийн мэдлийн бүх эд хөрөнгөө зарж борлуулах үйл явцыг эхлүүлэх талаараа мэдэгдсэн байна.

Дээрх арга хэмжээнүүд нь зөвхөн тус брэндийн АНУ дахь салбаруудтай хамааралтай бөгөөд Forever 21 брэндийн дэлхийн бусад улс орнууд дахь салбар дэлгүүрүүд, цахим худалдааны платформуудад хамааралгүй ажээ.

Forever 21 брэндийг 1984 онд АНУ-д ажиллаж амьдарч байсан Өмнөд Солонгосын цагаач нар Лос Анжелес хотноо анх үүсгэн байгуулж байсан түүхтэй. Тус брэнд ид үедээ дэлхийн хэмжээнд 800 салбар дэлгүүр ажиллуулж байснаас 500 нь АНУ-д байсан юм.