Израилын ерөнхий сайд Б.Нэтаньяху мягмар гарагийн үүрээр Газын зурваст үзүүлсэн агаарын цохилтыг “энэ бол дөнгөж эхлэл” хэмээн мэдэгджээ.
Тэрээр тухайн өдрийн үдэш хийсэн мэдэгдэлдээ Израил улс Газын зурвас дахь Хамас бүлэглэлийн эсрэг тулаанаа бүрэн хүчээр ахин эхлүүлснийг зарлаж, тус бүлэглэлд хандан “яриа хэлэлцээг зөвхөн дайны байдалд үргэлжлүүлэн явуулах болно” гэсэн байна.
Мөн тэрээр Израилын тал Газын зурваст хоригдож байгаа барьцааны хүмүүсийг суллах асуудлаар Хамастай яриа хэлэлцээ явуулахыг оролдсон боловч тухай бүрт Хамасын зүгээс татгалзсан хариу өгсөн хэмээн буруутгаж, Израил улс энэ дайны бүх зорилгууд болох “барьцааны бүх хүмүүсээ чөлөөлөн авч, Хамас бүлэглэлийг ахиж Израилд аюул заналхийлэл үзүүлэхгүй болгох”-ын тулд дайн тулаанаа үргэлжлүүлсээр байх болно гэдгийг хатуухан мэдэгдсэн байна.
АНУ-ын ерөнхийлөгч Д.Трампын засаг захиргаатай зөвлөлдсөний дараа Израил улс Газын зурваст агаарын цохилт үзүүлснийг албаныхан мэдэгдээд байгаа. Энэ талаар АНУ-ын Үндэсний аюулгүй байдлын зөвлөлийн хэвлэлийн төлөөлөгч Брайн Хьюжес хэлэхдээ “Хамас бүлэглэл гал зогсоох тохиролцоог сунгахын тулд барьцааны хүмүүсийг үргэлжлүүлэн суллаж болох байсан ч оронд нь татгалзаж, дайныг үргэлжлүүлэхийг сонгосон” гэжээ.
Харин Хамас бүлэглэлийн зүгээс хариу мэдэгдэлдээ Израил улс энэ удаагийн үйлдлээрээ Газад хоригдож байгаа Израилын үлдсэн барьцааны хүмүүст өөрсдийн гараар “цаазын ял” тогтоож магадгүй байгааг анхааруулаад байна. Хамас бүлэглэлийн барьцаанд Израилын 59 иргэн үлдсэнээс 24 нь амьд байгаа гэж Израилын тал үзэж байгаа юм.
Израилын зэвсэгт хүчний Газын зурваст үзүүлсэн агаарын цохилтын улмаас амь үрэгдсэн хүний тоо анх мэдээлж байснаас нэмэгдэж, 400-г даваад байгаагаас гадна олон зуун хүн бэртэж гэмтсэнийг Газын Эрүүл мэндийн яамнаас мэдээллээ.
1-р сарын 19-нд гал зогсоох тохиролцоо эхэлснээс хойш үзүүлээд байгаа энэхүү томоохон цохилтод Газын зурвасын Бейт Лахиа, Рафах, Нусейрат, Аль Маваси хотууд өртжээ.
Хоёр талын хооронд зуучлагчийн үүрэг гүйцэтгэгч Египет улсын зүгээс Израилын агаарын цохилтыг буруушаасан мэдэгдэл хийсэн байна. Египетийн ГХЯ-ны хэвлэлийн төлөөлөгч Тамим Халлаф Израилын агаарын цохилтыг “гал зогсоох гэрээг ноцтой зөрчсөн, дайны нөхцөл байдлыг улам хурцатгах аюултай үйлдэл боллоо” хэмээн цохон тэмдэглэсэн байна.
НҮБ-ын Аюулгүйн зөвлөлийн гишүүн орнууд ч мөн Израилын Газын зурваст үзүүлсэн цохилтын асуудлаар хэлэлцэж, Их Британи, Франц, ОХУ зэрэг ихэнх гишүүн орнууд Израилын талыг буруутгаж, нэн даруй байлдааны ажиллагаагаа зогсоохыг уриалсан бол АНУ Хамас бүлэглэлийг буруутгасан эсрэг байр суурьтай байгаагаа илэрхийлжээ.