Польш болон Балтийн тэнгисийн Эстони, Латви, Литва улсууд газрын мина-г хориглох олон улсын гэрээнээс хамтдаа гарахаар төлөвлөж байгаагаа зарлан мэдэгджээ. ОХУ-тай хиллэдэг дээрх улсууд энэхүү шийдвэрийнхээ шалтгааныг үндэсний аюулгүй байдалтай холбон тайлбарласан байна.

Дээрх дөрвөн улсын батлан хамгаалахын сайд нар мягмар гарагт хамтарсан мэдэгдэл гаргасан бөгөөд мэдэгдэлдээ ОХУ Украины эсрэг түрэмгий дайныг эхлүүлсний дараагаар бүс нутгийн аюулгүй байдлын нөхцөл үндсээрээ өөрчлөгдсөнийг онцолжээ.

Мэдэгдэлд мөн “бид улс орноо хамгаалах зэвсэгт хүчнээ шинэ зэр зэвсгээр хангах эрх чөлөө, сонголттой байх нь туйлын чухал асуудал болоод байна, тиймээс улс орныхоо нутаг дэвсгэр, эрх чөлөөг хамгаалахын тулд шаардлагатай бүхий л арга хэмжээг авах болно” гэдгийг тодотгосон байна.

Оттавагийн конвенц буюу газрын мина-г ашиглах, нөөцлөх, үйлдвэрлэх болон дамжуулахыг хориглосон олон улсын гэрээ нь 1999 оноос хүчин төгөлдөр үйлчилж эхэлсэн бөгөөд дэлхийн 160 гаруй улс орон гарын үсэг зуран, нэгдэн орсон байдаг юм. ОХУ уг гэрээнд нэгдэж ороогүй бол Украин улс нэгдэн орсон байдаг ч дайн эхэлснээс хойш талууд газрын мина-г ашигласаар байгаа.

Олон улсын хүний эрхийн хамгааллын Human Rights Watch байгууллагын зүгээс ОХУ болон Украин улсуудыг зөрчилдөө газрын мина хэрэглэж байгаа явдлыг хурцаар шүүмжлээд байгаа билээ.

Ийнхүү Польш болон Балтийн орнууд Оттавагийн конвенцоос гарахаар төлөвлөөд байгаа бол энэ сарын 6-ны өдөр мөн Литва улс Кластер тэсрэх бөмбөгийг хориглох олон улсын конвенцоос гарч байгаагаа зарласан байна.