АНУ-ын ерөнхийлөгч Д.Трампын Ойрхи Дорнодын асуудал эрхэлсэн тусгай элч төлөөлөгч Стив Виткофф орон нутгийн цагаар мягмар гарагийн үдэш хэлэхдээ, Орос-Украины гал зогсоох асуудлаар энэ сарын 23-ны өдөр АНУ болон ОХУ-ын төлөөлөгчид Саудын Арабын Жидда хотноо хэлэлцээ хийхээр болсон гэлээ.

Өнгөрсөн долоо хоногт АНУ, Украины төлөөлөгчид Саудын Арабын Жидда хотноо анх удаа уулзаж, уулзалтын дараа хамтарсан мэдэгдэл гаргаж, Украины тал 30 хоног түр гал зогсоох тухай АНУ-ын саналыг хүлээн авч байгаагаа илэрхийлсэн бол үргэлжлээд АНУ-ын ерөнхийлөгчийн Ойрхи Дорнодын асуудал эрхэлсэн тусгай элч төлөөлөгч Москва хотноо очиж, ОХУ-ын төрийн тэргүүнтэй хаалттай уулзалт хийж, түүний дараагаар энэ долоо хоногийн мягмар гарагт Д.Трамп, В.Путин нар утсаар ярилцаж, улмаар ОХУ 30 хоногийн хугацаанд эрчим хүчний байгууламжуудад цохилт өгөхөө зогсоохоор тохиролцсоныг талууд мэдээллээд байгаа билээ.

Тэгвэл Стив Виткофф орон нутгийн цагаар мягмар гарагийн үдэш Америкийн “Fox News” телевизэд өгсөн ярилцлагадаа энэ сарын 23-ны өдөр Америк, Оросын төлөөлөгчид гал зогсоох асуудлаар ахин уулзахаар болсныг мэдээлсэн байна. Түүний хэлснээр ням гарагт явагдах уулзалтанд АНУ-ын Төрийн нарийн бичгийн дарга Марко Рубио, АНУ-ын ерөнхийлөгчийн Үндэсний аюулгүй байдлын туслах Майк Уолц нар оролцох болно гэжээ.

Стив Уиткофф хэлэхдээ, “хоёр орны төрийн тэргүүнүүд утсаар ярилцахдаа мөргөлдөөнийг зогсоохын тулд эрчим хүч, дэд бүтцэд гал зогсоохоос эхлэхийн зэрэгцээ Хар тэнгист гал зогсоох, бүрэн гал зогсоох, улмаар энхийн гэрээ байгуулах асуудлаар үргэлжлүүлэн хэлэлцээ хийхийг зөвшөөрсөн, харин энэхүү зөвшилцөл амжилтад хүрэх эсэхийг бид энэхүү уулзалтаар шийдэж, зарим асуудлуудыг зайлшгүй тодорхой болгох хэрэгтэй” гэсэн байна.