ХБНГУ-ын хууль тогтоогчид тус улсын батлан хамгаалах салбарын төсвийг нэмэгдүүлэх асуудлаарх түүхэн гэж хэлж болох санал хураалтыг мягмар гарагт явуулсан байна.

Бундестаг буюу Германы парламентын гишүүдийн 60 гаруй хувь нь батлан хамгаалах салбарын төсвийг нэмэхийг дэмжсэн санал өгснөөр дээрх хуулийн төсөл олонхийн саналаар дэмжигджээ.

Уг хуулийн дагуу Герман улсын батлан хамгаалах, аюулгүй байдлын салбарт зарцуулах төсөв зардлыг тус улсын өр зээлийн тухай хуулиас гадуур, ангид авч үзэхээр болсноос гадна нийт 500 тэрбум еврогийн өртөг бүхий батлан хамгаалахын дэд бүтцийн санг байгуулахаар боллоо.

Энэхүү хуулийн төсөл дэмжигдсэнээр зөвхөн Герман улс гэлтгүй Европын бүс нутгийн аюулгүй байдалд томоохон өөрчлөлт орохоор болоод байна. Ялангуяа Украины дайн болон энэ дайнтай холбоотойгоор АНУ-ын ерөнхийлөгч Д.Трамп НАТО болон Европын аюулгүй байдлын салбар дахь АНУ-ын оролцоо тодорхойгүй байдалд орно гэдгийг цухалзуулсны дараа ХБНГУ ийм өөрчлөлтийг авчрахаас өөр аргагүй байдалд хүрсэн гэж хэлж болно.

Гэхдээ мягмар гарагт дэмжигдсэн батлан хамгаалахын төсвийг нэмэгдүүлэх тухай хуулийн төсөл хараахан батлагдчихаагүй байна. Тус улсын парламентын дээд танхим болох Бундесратын гишүүд дэмжсэн саналаар уг хуулийн төсөл батлагдах бөгөөд мөн л гуравны хоёр хувь нь дэмжсэн байх ёстой юм. Бундесрат дахь санал хураалт энэ долоо хоногийн баасан гарагт явагдахаар болжээ.