АНУ-ын Холбооны нөөцийн сангийн хоёр өдрийн турш үргэлжилсэн нээлттэй зах зээлийн хорооны мөнгөний бодлогын хурлын төгсгөлд бодлогын хүүгээ 4.25%-4.5% буюу өнгөрсөн 12-р сарын түвшинд хэвээр нь үлдээх шийдвэрийг гаргаснаа лхагва гарагт танилцууллаа.

Холбооны нөөцийн сангийн тэргүүн Жером Пауэлл АНУ-ын эдийн засгийн өсөлт саарч, инфляц өсөх магадлал нэмэгдсэнийг мэдээлж, ерөнхийлөгч Трампын тарифын бодлогоос үүдэн түр зуурын шинжтэй огцом үнийн өсөлт бий болж болзошгүйг анхааруулж, тарифын бодлого нь АНУ-ын эдийн засагт болон төв банкны бодлогод хэрхэн нөлөөлөх нь тодорхойгүй байгааг дурджээ.

Трампын засаг захиргааны тарифын бодлогын эдийн засагт үзүүлэх нөлөө одоогоор тодорхойгүй хэвээр байгаа ч 2025 онд бодлогын хүүг 0.25 пунктээр хоёр удаа бууруулах магадлалтай гэдгийг Холбооны нөөцийн сангаас мөн цухас мэдэгдлээ. Харин эдийн засгийн өсөлт нэмэгдэж, инфляц тогтвортой хэмжээнд байх тохиолдолд АНУ-ын Төв банк мөнгөний бодлогыг тогтвортой хадгална гэжээ.

АНУ-ын Холбооны нөөцийн сан ийнхүү хоёр дахь удаагаа дараалан бодлогын хүүгээ хэвээр үлдээх шийдвэр гаргаад байна.

Мөн ХНС-гийн зүгээс АНУ-ын 2025 оны эдийн засгийн өсөлтийн төлөвийг 0.4 хувиар бууруулж, 1.7 хувиар өснө, инфляцийн түвшинг 0.3 хувиар өсгөж энэ жил 2.8 хувьд байна гэж үзсэнээ мэдэгджээ.