Жил бүр тодруулдаг “Европын оны шилдэг мод” шагналыг Польшийн Дальков хотын түүхэн цэцэрлэгт хүрээлэнгийн 300 настай эвэрлэг мод дөрөв дэх жилдээ дараалан хүртээд байна. Дальков хотын оршин суугчдын хайрыг татаж, хүндлэл хүлээсэн гүн улаан өнгийн навчис бүхий уг эвэрлэг мод уг хотын бэлгэ тэмдэг болдог. Тус модыг очиж үзсэн хүмүүс модон дээрх нүх рүү самар шидэж оруулбал хүсэл биелнэ гэж үздэг аж. Үүнтэй холбоотойгоор уг мод руу самар шидэх уламжлал тогтоод удаж байна.

“European Tree of the Year” тэмцээнийг хүн ардын байгаль орчинтойгоо харилцах харилцаа, хүрээлэн буй орчноо хайрлаж хамгаалах явдлыг сурталчилж, түгээн дэлгэрүүлэх үүднээс зохион байгуулдаг байна. Тус тэмцээний хоёрдугаар байрт Португалын Коимбра хотын Куинта дас Лагримас цэцэрлэгт хүрээлэнгийн аварга том инжирийн мод орлоо. Энэхүү модны үрийг XIX зууны үед Австралийн Сидней хотын Ботаникийн цэцэрлэгт хүрээлэнгээс өөр модны үрээр солин, авчирч суулгажээ.

Харин гуравдугаар байрт Испанийн Абенгибре хотын Пино де Хуан Молинера хэмээх нэрээрээ алдартай, 400 настай аварга том нарс орсон байна. Энэ алдартай мод нь үер усны гамшиг, цасан шуурга, аянга, цахилгаан гээд олон он цагийн олон даваа нугачаа, шалгуурыг даван гарахын зэрэгцээ үе үеийн хүн ардын дурсамжийг хуваалцан, сэтгэл зүрхэнд нь хадгалагдан үлдсэн ажээ.

“European Tree of the Year” тэмцээнийг анх 2011 оноос зохион байгуулж ирсэн байна. Эхний шатанд Европын улсууд өөрсдийн нэр дэвшигч модыг тодруулж, шувтаргын шатны санал хураалтыг жил бүрийн 2-р сард цахимаар явуулдаг. Үүгээр Европын шилдэг модыг тодруулдаг байна.

Анхны тэмцээнд Европын 5 улс оролцсон бол өнөөдөр 16 болж нэмэгджээ. Тус тэмцээнийг Хүрээлэн буй орчны түншлэлийн холбоо (Environmental Partnership Association) зохион байгуулдаг байна.