Туркийн эрх баригчид Истанбул хотын дарга Экрем Имамоглуг авлига болон террорист бүлэглэлд дэмжлэг туслалцаа үзүүлсэн хэрэгт буруутган, лхагва гарагт баривчилсан байна. Истанбул хотын дарга, Бүгд найрамдах ард түмний намын гишүүн болох Экрем Имамоглуг улс төрийн тавцанд Туркийн Төрийн тэргүүн Режеп Тайип Эрдоаны томоохон өрсөлдөгчийн нэг гэж үздэг юм.

Тэгвэл ийнхүү Экрем Имамоглуг Ерөнхийлөгчийн сонгуульд өрсөлдөх нэр дэвшигчээр тодрохоос хэдхэн өдрийн өмнө баривчлан хорилоо. Тэрээр 2028 оны Ерөнхийлөгчийн сонгуульд өрсөлдөхөөр нам доторх сунгаанд нэрээ дэвшүүлсэн цорын ганц улстөрч байсан бөгөөд энэ долоо хоногийн ням гарагт тэрээр сонгогдох гэж байсан ажээ.

Түүний нам эрх баригчдын үйлдлийг “Ард түмний дараагийн Төрийн тэргүүнээ сонгох сонголтод нь саад учруулж буй төрийн эргэлт хийх гэсэн оролдлого” хэмээн шүүмжилжээ. Экрем Имамоглугийн суралцаж төгссөн Истанбулын их сургууль түүний дипломыг хүчингүй болгосноо зарласны дараа өдөр нь түүнийг баривчилсан юм. Хэрвээ дээд боловсрол эзэмшээгүй гэдэг нь батлагдвал тэрээр Ерөнхийлөгчийн сонгуульд нэр дэвших боломжгүй болох юм байна.

Экрем Имамоглу “Истанбулын их сургуулийн шийдвэр хууль эрхзүйн үндэслэлгүй. Дээд боловсрол олгогч байгууллагууд улс төрийн нөлөөллөөс ангид, хараат бус, чөлөөт байж, үйл ажиллагаа нь зөвхөн мэдлэг боловсрол олгоход л чиглэгдсэн байх ёстой” гэжээ.

Харин Туркийн Засгийн газрыг дэмжигч хэвлэл мэдээллийн хэрэгслүүд Экрем Имамоглуг авлига, луйврын хэргүүдээс гадна Турк, ЕХ, Их Британи, АНУ-д албан ёсоор террорист байгууллага гэж үздэг Курдистаны ажилчдын намд дэмжлэг туслалцаа үзүүлсэн хэмээн буруутгасан утгатай мэдээлэл цацаад байна.

Эрх баригчид дээр дурьдсан авлига, хээл хахууль болон террорист байгууллагыг санхүүжүүлж, дэмжлэг туслалцаа үзүүлсэн гэх үндэслэлээр 100 хүнийг баривчлаад байгаагийн дотор улстөрчид, сэтгүүлчид, бизнесмэнүүд багтжээ. Прокурорууд Экрем Имамоглуг дээрх хэргүүдэд буруутгаж, түүнийг “Гэмт хэргийн бүлэглэлийн толгойлогч” хэмээн сэжиглэж байгааг онцолсон байна.

Экрем Имамоглу нийгмийн сүлжээнд нийтэлсэн дүрстэй мэдэгдэлдээ “Ард түмний хүсэл сонирхол, дуу хоолойг нухчин дарах боломжгүй. Ардчилал болон шударга ёсны төлөө, мөн Туркийн ард түмний төлөө зогсох болно” гэжээ.

Истанбул мужийн захирагчийн алба тус хотод дөрөв хоногийн хязгаарлалт зарлаж, энэ хугацаанд бүх төрлийн жагсаал цуглаан, уулзалт, бусад олон нийтийн арга хэмжээг зохион байгуулахыг хоригложээ. Хэдийгээр ийнхүү хориглосон боловч Истанбул болон бусад хотод олон мянган хүний эсэргүүцлийн жагсаал, цуглаан зохиогдож эхлээд байгаа бөгөөд иргэд Засгийн газрыг эсэргүүцсэн уриа лоозон барин жагсаж, “Эрдоан – дарангуйлагч”, “Имамоглу, бид чамтай хамт” гэх зэргээр орилж хашхиран жагссаар байна.

Шүүмжлэгчид Туркийн эрх баригчдын зүгээс сүүлийн саруудад идэвхтэй явуулж байгаа баривчилгааг улс төрийн зорилготой гэж үзэн, буруушааж байгаа бол сүүлийн 22 жилийн турш төр, засгийг удирдсан Ерөнхийлөгч Режеп Тайип Эрдоан болон түүний нам үүнийг эрс үгүйсгэж, “Турк улсын шүүхийн систем биеэ даасан, хараат бус үйл ажиллагаа явуулдаг” хэмээн мэдэгдсэн байна.  

Олон улсын зүгээс Туркийн эрх баригчдын үйлдэлд харамсаж байгаагаа илэрхийлсэн мэдэгдэл гаргаад байна. ЕХ, Франц, Герман зэрэг улс орны албаныхны зүгээс Имамоглуг барьж хорьсон явдлыг буруушаасан байр суурь илэрхийлжээ.

Хэдийгээр сөрөг хүчний хүчтэй улстөрчийг барьж хорьсон явдал ийнхүү дотоод болон гадаад орчны анхаарлыг татаж эхлээд байгаа ч Экрем Имамоглугийн хувьд өмнө нь ч мөн олон хэрэгт сэжиглэгдэж байсан түүхтэй хүн юм. Тэрээр 2019 онд Турк улсын Сонгуулийн хороог доромжилсон хэрэгт буруутгагдаж байснаас гадна Истанбул хотын Бейликдузу дүүргийн засаг даргаар ажиллаж байхдаа тендерийн хэрэгт холбогдсон бол хамгийн сүүлд энэ оны 1-р сарын 20-нд прокурорыг шүүмжилж, доромжилсон хэрэг түүнийг буруутгаж, шинэ хэрэг үүсгэсэн байна.