Формула 1 уралдааны гүйцэтгэх захирал Стефано Доменикали Тайландын ерөнхий сайд Петонгтарн Шинаватратай уулзаж, дэлхийн алдарт автомашины уралдааныг Тайландын нийслэл Бангкок хотод зохион байгуулах талаар яриа хэлэлцээ явуулсан байна.

Хэлэлцээний түвшинд үргэлжилж байгаа төлөвлөгөөний дагуу Формула 1 уралдааны Гран-При буюу аварга шалгаруулах тэмцээнийг Тайландын нийслэл Бангкок хотын гудамжинд тойрог байдлаар зохион байгуулахаар ярилцаж байгаа гэнэ.

Стефано Доменикали Тайландын засгийн газартай хэлэлцэж байгаа дээрх төлөвлөгөөг “гайхамшигтай” хэмээн тодорхойлжээ.

Тайландын ерөнхий сайд П.Шинаватра хэлэхдээ тус улсын засгийн газар Формула 1 уралдааныг Бангкок хотноо 2028 онд зохион байгуулах боломж, бололцоог сайтар судлах болно гэсэн байна.

Тэрээр хэлэхдээ, “энэхүү арга хэмжээг зохион байгуулснаар Тайландын хүн бүр ямар нэгэн байдлаар ашиг хүртэх болно, уралдаанд зориулсан томоохон хэмжээний хөрөнгө оруулалтууд хийгдэж, ажлын байрууд олноороо нэмэгдэж, орлогын шинэ эх үүсвэрүүд бий болж, шинэ технологи, инновациуд ч импортлогдон орж ирэх болно” гэжээ.

Тайландын зүүн хойд хэсгийн Бурирам хотод FIA буюу Олон улсын мотоспортын холбооны зөвшөөрөлтэй цорын ганц уралдааны зам байдаг байна.

2025 оны Формула 1 уралдааны нийт 24 тэмцээний 4 нь Ази-Номхон далайн бүс нутагт зохиогдох хуваарьтай байгаа ажээ.