БНСУ-ын ерөнхийлөгч Юн Сок Ёлыг импичментээр огцруулах эсэх тухай Үндсэн хуулийн шүүхийн шийдвэрийг орон даяараа хүлээсээр байна.

Одоогийн байдлаар импичментийн шүүх хурлын шийдвэр хүлээгдсээр гурав дахь долоо хоногоо даван үргэлжилж байгаа бөгөөд баасан гарагт шийдвэр гарах эсэх нь тодорхойгүй байна.

Эргэн сануулахад өмнө нь импичментээр огцруулж байсан тус улсын ерөнхийлөгч асан Пак Гын Хэ, Но Му Хён нарын шүүх хурлын шийдвэрүүд хамгийн ихдээ хоёр долоо хоногийн дотор гарч байсан бол Юн Сок Ёл ерөнхийлөгчийн импичментийн шийдвэр гаралгүй 23 дахь хоногтоо (3-р сарын 20-ны өдрийн байдлаар) ороод байна.

Найман гишүүнтэй Үндсэн хуулийн шүүх эцсийн шийдвэр гаргах асуудлаар энэ долоо хоногийн мягмар гарагт чуулсан хэдий ч одоог хүртэл шийдээ гаргахгүй удаж байгаа явдал нь мөн шүүхийн шийдвэр гаргах үйл явцыг юу ийнхүү удаашруулахад хүргэж байна вэ гэсэн асуулт, сэжгийг нийгэмд төрүүлж, нийгмийг хувааж талцуулах байдлыг авчраад байна.

Зарим эксперт мэргэжилтнүүдийн зүгээс Үндсэн хуулийн шүүхийг хэдийнээ санал нэгтэйгээр Юн Сок Ёлыг огцруулах шийдвэрээ гаргасан ч шийдвэрийг танилцуулах үеэр олон нийтийн зүгээс ирэх эсэргүүцлийг багасгахын тулд ямар ч маргаангүй, гарцаагүй байдлаар шийдвэрээ танилцуулахын тулд ингэж удаж байна гэж үзэж байгаа бол зарим нь Үндсэн хуулийн шүүхийн гишүүд улс төрийн үзэл санааны хувьд хуваагдсан тул нэгдмэл шийдвэр гаргах тал дээр асуудал үүсээд байгаа хэмээн таамаглаж байна.

Аль ч тохиолдолд шийдвэрээ гаргаж танилцуулахыг бүх талаас хүлээж, шахалт үзүүлсээр байгаа юм. Юн Сок Ёлын импичментийг дэмжиж байгаа Ардчилсан нам гэх зэрэг сөрөг хүчнийхний хувьд түүнийг огцруулсны дараа ээлжит бус сонгуулийг зохион явуулахыг гол зорилгоо болгож байгаа бол ерөнхийлөгчийн талд зогсч буй консерватив хүчнийхний хувьд Юн Сок Ёлын эсрэг үүсгэсэн хэргийг хэрэгсэхгүй болгохыг уриалсаар байгаа ажээ.

Үндсэн хуулийн шүүхийн 8 гишүүний 6 нь Юн Сок Ёлыг импичментээр огцруулахыг дэмжсэн тохиолдолд түүнийг шууд албан тушаалаас нь огцруулж, шийдвэр гарснаас хойш 60 хоногийн дотор ээлжит бус сонгуулийг зохион байгуулах хуультай. Харин 3 гишүүн импичментийг эсэргүүцсэн тохиолдолд Юн Сок Ёл ерөнхийлөгчийн албан тушаалдаа эргэн орж, төрийн тэргүүний ажлаа үргэлжлүүлэх юм.

Юн Сок Ёлыг огцруулах болон албан тушаалд нь үлдээх сонирхолтой, эсрэгцсэн байр суурьтай ард иргэдийн жагсаал цуглаанууд мөн Сөүл хотноо үргэлжилсээр байна.