АНУ ирэх долоо хоногийн даваа гарагт Саудын Арабын Эр Рияд хотноо ОХУ болон Украинтай тусдаа уулзалт, яриа хэлэлцээг явуулахаар болсныг эх сурвалжууд мэдээллээд байна.
Талууд энэ долоо хоногт АНУ-ын талаас тавьсан эрчим хүчний дэд бүтцүүдэд хэсэгчилсэн гал зогсоох саналыг зөвшөөрөн, хүлээн авсны дараагаар ийнхүү ирэх долоо хоногийн эхээр ахин хэлэлцээ явуулахаар боллоо.
Кремлиэс пүрэв гарагт хийсэн мэдэгдэлдээ Америк, Оросын дипломат баг төлөөлөгчдийн ажлын түвшний яриа хэлэлцээ Саудын Арабын Эр Рияд хотноо явагдахаар болсныг мэдээлж, ОХУ-ын төлөөлөгчдийн багийг тус улсын парламентын дээд танхим буюу Холбооны зөвлөлийн ОУ-ын асуудал хариуцсан хорооны дарга Григорий Карасин, ОХУ-ын Холбооны аюулгүй байдлын албаны даргын зөвлөх Сергей Беседа нар тэргүүлэн оролцохоор болсон гэжээ.
Скандинавын орнуудаар айлчилж байгаа Украины ерөнхийлөгч В.Зеленский Норвегийн нийслэл Осло хотноо хийсэн хэвлэлийн бага хурлын үеэрээ мөн ирэх долоо хоногийн эхээр Саудын Араб улсад явагдах АНУ-Украины ажлын хэсгийн яриа хэлэлцээний талаар мөн мэдээлсэн байна.
Тэрээр Украины дипломат төлөөлөгчид даваа гарагийн уулзалтаар АНУ-ын талд Оросын довтолгооноос хамгаалагдахыг хүсэж байгаа Украины дэд бүтцийн байгууламжуудын жагсаалтыг хүлээлгэн өгөх болно гэжээ.
Вашингтоны зүгээс Украины Запорожье цөмийн цахилгаан станцыг эзэмших боломж бололцооны талаар энэ долоо хоногт цухуйлгаад байгаа талаар асуусан сэтгүүлчийн асуултанд Зеленский хариулахдаа “бүх цөмийн цахилгаан станцууд Украины ард түмэнд харъяалагдах болно, тус цөмийн цахилгаан станц бол хувийн бус төрийн өмч, Украинд цөмийн эрчим хүчний асуудлыг төр засаг л хариуцдаг” гэж тодотгожээ. Гэхдээ тэрээр АНУ-ыг тус цахилгаан станцыг Оросуудын хяналтаас гарган авч, хөрөнгө оруулалт хийж, шинэчлэх асуудал дээр хамтран ажиллахад нээлттэй гэдгийг мөн хэлсэн байна.
Мөн түүнээс ОХУ-д буулт хийж, нутаг дэвсгэрээ, ялангуяа Крымыг өгөхөд бэлэн байгаа юу гэсэн асуултанд тэрээр “Крым бол Украины хойг, манай улсын газар нутгийн нэг хэсэг юм” гэж хариулжээ. Гал зогсоох тохиролцоог хэрхэн яаж харж байна гэсэн асуултанд Зеленский хариулахдаа, “эхний шатанд хуурай газар болон далай тэнгист гал зогсоох хэрэгтэй, энэ нь Оросын түрэмгийллийг зогсоох цорын ганц арга зам” гээд, энхийн яриа хэлэлцээнд ЕХ заавал оролцох ёстойг онцолж, Европын улс орнуудыг ОХУ-д үзүүлэх дарамт шахалтаа зөөлрүүлэхгүй байхыг уриалжээ.
Энэ үеэр мөн нэгэн сонирхолтой үйл явдлыг АНУ-ын “Politico” сэтгүүл мэдээллээд байна. Тус сэтгүүл АНУ-ын ерөнхийлөгч Д.Трамптай ойр дотно харилцаатай хүмүүс Украины сөрөг хүчнийхэнтэй нууц яриа хэлэлцээ хийсэн болохыг Украины парламентын 3 гишүүн, АНУ-ын Бүгд найрамдах намын гадаад бодлогын шинжээч нар баталсан хэмээн мэдээлжээ. Уг нууц уулзалтад оролцсон Украины төлөөлөгчдийн бүрэлдэхүүнд ерөнхий сайд асан Ю.Тимошенко болон ерөнхийлөгч асан П.Порошенкогийн намын өндөр зиндааны гишүүд багтсан бол АНУ-ын төлөөлөгчдийн бүрэлдэхүүнд Д.Трампын ууган хүү Доналд Трамп Жуниор, хүргэн Жаред Кушнер, сэтгүүлч Такер Карлсон, АНУ-ын ерөнхийлөгчийн Ойрхи Дорнодын асуудал хариуцсан тусгай элч Стив Уиткофф нар багтсан байна. Дээрх нууц яриа хэлэлцээний гол сэдэв нь Украинд ерөнхийлөгчийн сонгуулийг зохион байгуулах асуудал байсан бөгөөд үүгээрээ Трампын засаг захиргаа Украины сөрөг хүчинтэй мөн давхар харилцаж, Украинд өөр бусад түншүүдтэй гэдгээ харуулж, улмаар В.Зеленскийн эрх мэдлийг сулруулж, түүнийг АНУ-д илүү дуулгавартай болгохыг оролдож байгаа талаар “Politico” сэтгүүлд бичжээ.