АНУ-ын ерөнхийлөгч Д.Трамп тус улсын Боловсролын департаментыг хааж, үйл ажиллагааг нь зогсоох үйл явцыг шууд эхлүүлэх тушаалд пүрэв гарагт гарын зуржээ.

“Бид тус департаментыг аль болох түргэн хугацаанд хаах ажлыг эхлүүллээ” хэмээн гарын үсэг зурсныхаа дараа тэрээр хэлсэн бөгөөд 2024 оны сонгуулийн сурталчилгааны үеэр өгч байсан ээлжит нэгэн амлалтаа ийнхүү биелүүлээд байна.

Зөвхөн өнгөрсөн жилийн кампанит ажил гэлтгүй тэрээр олон жилийн өмнөөс Боловсолын департаментын үйл ажиллагааг зогсоож, хаахыг уриалсаар ирсэн.

Гэхдээ тус яамны үйл ажиллагааг бүрмөсөн зогсоож, хаахын тулд Конгрессын зөвшөөрөл шаардлагатай бөгөөд ажиглагчдын зүгээс Трампын тушаал шийдвэрт Конгресс зөвшөөрөл олгохгүй гэж харж байгаа юм.

Тус департаментын маш олон ажилтанг энэ долоо хоногт цомхотголд хамруулж (21-ний баасан гарагаас эхлэн 2100 ажилтанг цомхотгохоор болсон), улмаар хаах үйл явцыг эхлүүлэх ерөнхийлөгчийн зарлиг тушаал ийнхүү батлагдаад байгаа ч хууль эрхзүйн сорилтуудтай тулгарах нь мөн тодорхой байна.

Д.Трамп хэлэхдээ, “хэдийгээр АНУ дэлхийн бусад улс оронтой харьцуулахад үлэмж их хэмжээний хөрөнгө, мөнгийг боловсролын салбарт зарцуулдаг ч боловсролын түвшний хувьд доогуур жагсдаг” гэжээ. Мөн тэрээр Боловсролын департаментыг залууст улс төр, арьс өнгө, бэлгийн боловсролын талаар буруу суртал ухуулга явуулдаг хэмээн буруутгасан байна.

1979 онд анх үүсгэн байгуулагдаж байсан Боловсролын департамент нь ерөнхий боловсролын сургуулиудын төсөв санхүүжилт, оюутнуудын зээл тусламж болон бага орлоготой оюутнуудад дэмжлэг үзүүлэх төсөл хөтөлбөрүүдийг хариуцдаг яам бөгөөд тус яамны жилийн төсөв ойролцоогоор 238 тэрбум ам.доллараар хэмжигддэг байна.