Энэ долоо хоногийн эхээр Израилын зүгээс Газын зурваст агаараас цохилт өгсний хариуд Хамас бүлэглэл Израилын Тель Авив хот руу пуужин харважээ.

Тодруулбал, Хамас бүлэглэлийн зүгээс Израилын Тель Авив хот руу 3 пуужин харвасан талаараа мэдээлсэн байна. Израилын агаарын довтолгооноос хамгаалах систем Хамасын нэг пуужинг агаарт амдан устгасан бол үлдсэн хоёр пуужин нь хүн оршин суудаггүй бүсэд унасан гэж Израилын талаас мэдэгджээ.

Ийнхүү 1-р сарын 19-ний өдөр эхэлж, 6 долоо хоногийн хугацаанд үргэлжилсэн гал зогсоох тохиролцоог үргэлжлүүлэх эсэх нь тодорхойгүй байдалд ороод байсан талууд дайн байлдааны үйл ажиллагааг ахин эхлүүллээ.

Анх Израилын талаас энэ долоо хоногийн мягмар гарагт Газын зурвасын шигүү суурьшилтай 3 хотод агаарын цохилт үзүүлсэн бөгөөд Израилын цохилтын улмаас наад зах нь 591 хүн амиа алдаад байгаагийн 200 гаруй нь бага насны хүүхдүүд байсан гэж Газын Эрүүл мэндийн яамнаас мэдэгдсэн байна.

Хариуд нь Хамас бүлэглэл Тель Авив хот руу гурван пуужин харважээ.

Түүнчлэн пүрэв гарагт Израилын зэвсэгт хүчний зүгээс Палестины нутаг дэвсгэр дээрх байлдааны ажиллагаагаа эхлүүлээд байгаагаа мэдэгдлээ. Тус мэдэгдэлд Израилын цэргүүд Газын зурвасын Египеттэй хиллэдэг Рафах хотод болон мөн Газын төв, баруун нутгуудад хуурай газрын байлдааны ажиллагааг эхлүүлж, террорист бүлэглэлийн дэд бүтцүүдийг ажиллагаагүй болгож байгааг онцлов.

Харин Арабын зарим хэвлэл мэдээллийн хэрэгслүүд Хамас бүлэглэлтэй холбоо бүхий эх сурвалжийг эш татан мэдэгдэж байгаагаар тус бүлэглэл гал зогсоох тохиролцооны хоёр дахь үе шатыг эхлүүлж, Израилын барьцааны хүмүүсийг суллах асуудлууд багтсан ямар ч санал нээлттэй байгаа гэжээ.

Израил, Хамасын хоорондох зуучлагчаар хөрш зэргэлдээх Египет, Катар улсууд үргэлжлүүлэн ажилласаар байгаа бөгөөд пүрэв гарагт Катарын ерөнхий сайд Аль Тани, Египетийн гадаад хэргийн сайд Бадр Абделатти нар утсаар холбогдон ярилцаж, Газын зурваст гурван үе шаттай гал зогсоох тохиролцоог үргэлжлүүлэх тал дээр хамтын идэвхи чармайлтаа нэмэгдүүлэх шаардлагатай байгаа дээр санал нэгдсэн байна.