Сонгогдоод удаагүй байгаа Канадын шинэ Ерөнхий сайд Марк Карни ээлжит бус нэгдсэн сонгуулийг ирэх сарын 28-ны өдөр явуулахаар зарлаж магадгүй байгаа талаар нэлээд олон хэвлэл мэдээллийн хэрэгсэл мэдээлээд байна. “The Globe”, “Mail”, “Associated Press” зэрэг агентлаг ээлжит бус сонгуулийн товыг 4-р сарын 28 хэмээн тогтоохоор төлөвлөж байгаа талаар Засгийн газрын эх сурвалжийг эш татан мэдээлжээ.

Хэвлэлүүдийн мэдээлснээр Марк Карниг ээлжит бус сонгууль явуулах тухай мэдэгдлээ ням гарагт хийж магадгүй байгаа гэсэн байна.

Канадын эрх баригч Либерал намын даргаар сонгогдоод удаагүй байгаа шинэ Ерөнхий сайд Марк Карни үнэхээр ээлжит бус сонгуулийг 4-р сарын 28-ны өдөр явуулахаар зарлавал тэрээр парламентыг тарааж, дараагаар нь сонгуулийн сурталчилгааны кампанит ажилдаа орох ёстой болох юм.

Улс төрийн намуудын хувьд сонгуулийн сурталчилгааны кампанит ажлаа явуулахад 5 долоо хоногийн хугацаа оногдох болно. Сонгуулийн сурталчилгаа богино хугацаанд үргэлжлэх нь Марк Карнид л илүү ашигтай байх болно хэмээн улс төрийн зарим ажиглагч үзэж байна.

Энэ удаагийн сонгуульд оролцох улс төрийн намууд мөрийн хөтөлбөртөө Канад улсыг АНУ-ын 51 дэх муж болгох тухай удаа дараа ярьж байгаа, Канадын эсрэг худалдааны дайн эхлүүлээд байгаа Д.Трампын эсрэг ямар арга хэмжээ авах, ямар бодлого төлөвлөгөө боловсруулж оруулах вэ гэдгээс ялалт байгуулах эсэх нь шийдэгдэх юм. Өдгөө 60 настай эдийн засагч Марк Карнигийн хувьд Трампын засаг захиргааны тарифын эсрэг харилцан тэгш тариф ногдуулахаа амласан.

Энэ удаагийн Канадын ээлжит бус нэгдсэн сонгуулийн гол өрсөлдөөн эрх баригч Либерал намын дарга Марк Карни болон Консерватив намын дарга Пьер Пойевре нарын хооронд явагдах болов уу гэж ажиглагчид үзэж байна.