Өмнөд Солонгос улсын Үндсэн хуулийн шүүх тус улсын ерөнхий сайд Хан Доксуг импичментээр огцруулах тухай Үндэсний Ассамблейн саналыг хэрэгсэхгүй болгох шийдвэрийг орон нутгийн цагаар даваа гарагийн өглөө гаргалаа.

Үндсэн хуулийн шүүхийн 8 гишүүний 5 нь түүнийг импичментээр огцруулахыг эсэргүүцэж, нэг гишүүн дэмжиж, хоёр нь түдгэлзсэн санал өгсөн байна.

Ийнхүү Үндсэн хуулийн шүүхийн эцсийн шийдвэр гарснаар түүний БНСУ-ын ерөнхий сайд болон ерөнхийлөгчийн үүргийг гүйцэтгэгчийн албан тушаал ахин сэргэж, түүнийг шүүгдэх хугацаанд засгийн газрын тэргүүнээр ажиллаж байсан сангийн сайд Чой Сан Мокоос үүрэг ажлуудаа хүлээж аваад байна.

БНСУ-ын Үндэсний Ассамблейн зүгээс Хан Доксуг 2024 оны 12-р сарын 3-ны өдөр ерөнхийлөгч Юн Сок Ёлын цэргийн онц байдалд зарласан үйл ажиллагаанд оролцсон хэмээн буруутгаж, импичментээр огцруулах санал хураалтыг явуулснаас 87 хоногийн дараа Үндсэн хуулийн шүүх шийдвэрээ гаргалаа.

Тухайн үед хууль тогтоогчид ерөнхий сайд Хан Доксуг цэргийн онц байдал зарлахаас урьдчилан сэргийлж чадаагүй, Үндэсний Ассамблейн зүгээс Үндсэн хуулийн шүүгчдээр томилохоор сонгосон нэр дэвшигчдээс шударга бус байдлаар татгалзсан, Юн Сок Ёлын хэргийг мөрдөх тусгай төлөөлөгчийн томилгоонд татгалзсан хариу өгсөн гэх зэргээр олон хэрэгт буруутгаж, импичментээр огцруулахаар дэмжиж байсан юм.

Түүнийг импичментээр огцруулах хэргийн сонсгол өнгөрсөн 2-р сарын 19-ний өдөр ердөө ганцхан удаа явагдсан бөгөөд Хан Доксу шүүх дээр өөрийг нь буруутгасан бүх үндэслэл хүчингүй гэж танилцуулсан билээ.

Үндсэн хуулийн шүүхээс ерөнхий сайд Хан Доксуг өнгөрсөн оны сүүлээр цэргийн онц байдал зарлах үйл ажиллагаанд ямар нэгэн байдлаар оролцсоныг батлах ямар ч нотлох баримт олдоогүй учраас түүнийг импичментээр огцруулах Үндэсний Ассамблейн саналыг хэрэгсэхгүй болгох шийдвэрийг гаргаснаа танилцуулжээ.

Бүх албан тушаал, эрх мэдэл нь сэргэсэн ерөнхий сайд Хан Доксу Үндсэн хуулийн шүүхийн шийдвэрийг хүлээн авч байгаагаа илэрхийлж, “ухаалаг шийдвэр” байлаа хэмээн тодорхойлоод, шууд нийслэл Сөүл хот дахь Засгийн газрын байр луу хөдөлсөн байна.

Мөн тэрээр “юун түрүүнд улс орны хамгийн чухал, тулгамдсан асуудлуудад анхаарал хандуулах болно, дэлхийн геополитикийн нөхцөл байдал өөрчлөгдөж байгаа энэ үед олон улсын асуудлуудад давхар анхаарлаа хандуулж ажиллах болно, энэ бүх асуудлууд дээр кабинетын гишүүд, улс төрийн салбарынхан болон Үндэсний Ассамблейтай ойр хамтарч ажиллах болно” хэмээн мэдэгджээ.