Ромын Пап Францис сар гаруй хугацаанд эмчилгээ хийлгэснийхээ дараагаар ням гарагт эмнэлгээс гарсан байна.

Өдгөө 88 настай Ромын Пап Францис Италийн нийслэл Ром хотын Жемелли эмнэлэгт өнгөрсөн 2-р сарын 14-ний өдөр хэвтсэн юм. 

Тэгвэл тэрээр сүүлийн 5 долоо хоногийн турш уушгины хатгалгаа өвчний эмчилгээ хийлгэснийхээ дараагаар ийнхүү эмнэлгээс гарч байгааг Ватиканы зүгээс албан ёсоор мэдэгдлээ.

Эмнэлгээс гарахаасаа өмнө Ромын Пап тагтан дээр тэргэнцэртэй гарч ирэн, түүнд эрүүл энхийг хүссэн хүн ардад хоёр гараараа даллан мэндчилж, “та бүгдэд баярлалаа” хэмээн хэлсэн байна.

Эмнэлэгт байх хугацаанд түүний эрүүл мэнд хоёр ч удаа маш хүнд нөхцөл байдалд орсон боловч дараагаар нь биеийн байдал нь сайжирсан талаар түүний эмч нарын нэг болох доктор Сержио Альфиери хэлсэн байна. 

Католик шашны тэргүүнийг эмчилсэн эмч нарын зүгээс түүнийг хамгийн багадаа хоёр сарын хугацаанд тайван амрах ёстой гэдгийг мөн онцолжээ.

Ромын Пап Францис католик шашны тэргүүний албыг сүүлийн 12 жилийн хугацаанд хашиж байгаа билээ.