Ус цаг уур, орчны судалгаа мэдээллийн хүрээлэн 10 хоногт нэг удаа хээрийн цасыг хэмждэг. Энэ сарын 20–ны байдлаар нийт нутгийн 46 хувьд цастай байна. Үүнээс Увсын Хяргас, Цагаанхайрхан, Хөвсгөлийн Цэцэрлэг, Цагаан-Үүр, Ренчинлхүмбэд 10–20 см, Хөвсгөлийн Алаг-Эрдэнэд 26 см, бусад нутгаар 0-10 см хүртэл зузаан цастай байна.

Өнгөрсөн 10 хоногт агаарын температур нийт нутгаар -11.5…-1.1 градусаар хүйтэн, хур тунадас ихэнх нутгаар олон жилийн дунджийн орчим оров. Баян-Өлгий, Увс, Ховд, Говь-Алтай, Баянхонгорын ганц нэг сумын нутгаар олон жилийн дунджаас бага хур тунадас уналаа.

Салхины хурд тал, хээр болон говийн нутгаар түр зуур 16–27 м/с буюу аюултай үзэгдлийн хэмжээнд хүрч салхилсан гэж Ус цаг уур, орчны судалгаа мэдээллийн хүрээлэнгийн Хөдөө аж ахуйн цаг уурын судалгааны хэлтэс мэдээллээ.