Мансууруулах эм, сэтгэцэд нөлөөт бодисын эргэлтэд хяналт тавих тухай хуулийн шинэчилсэн найруулгын төслийн хэлэлцүүлэг өнөөдөр боллоо. Хэлэлцүүлгийн хүрээнд мансууруулах бодисын хэрэглээг дэлгэрүүлэхгүй байхын тулд хүүхэд залуус руу чиглэсэн боловсролын агуулга чухал байгааг онцолсон юм. Монгол улсын хувьд мансууруулах бодисын хэрэглээг хумих чиглэлд гарсан олон улсын олон төрлийн гэрээ конвенцид нэгдэн орсон байдаг. Бусад улс орны туршлагуудад мансууруулах бодисын дагуулах аюул заналыг хүүхэд залууст бага наснаас нь ойлгуулах чухал ач холбогдолтойг онцолдог байна.
Хэлэлцүүлгийн үеэр мансуурах эмгэгтэй хүнийг сайн дураараа эмчлүүлэх гээд очиход хуулийн хариуцлага хүлээлгэх асуудал угтдаг хууль эрх зүйн орчноо өөрчлөх шаардлагатайг Хууль зүйн дэд сайд мэдэгдлээ.
Монгол улс 2010 он хүртэл мансууруулах бодис дамжин өнгөрөгч улсын тоонд багтдаг байсан бол 2020 онд мансууруулах бодис хэрэглэгч орны статустай болжээ. Хэрвээ цаашид мансууруулах бодисын хэрэглээний эсрэг хууль эрх зүйн орчноо сайжруулж чадахгүй энэ чигээрээ үргэлжилбэл мансууруулах бодисын хэрэглээний мафитай улс болох аюул байгааг мэргэжилтнүүд онцолж байна.
Сүүлийн 10 жилийн хугацаанд Монгол улсад хар тамхитай холбоотой 2100 гэмт хэрэг бүртгэгджээ. 2025 оны хувьд хар тамхи, мансууруулах бодистой холбоотой 307 гэмт хэрэг бүртгэгдсэн гэнэ.
Монгол улсын 47 иргэн гадаад улсад хар тамхитай холбоотой гэмт хэрэгт холбогдож хилийн чанадад ял эдэлж байна.