Дундговь аймгийн Сайнцагаан сумын Суман уулын дурсгалт газарт Монгол-Солонгосын судалгааны баг Хүннүгийн үеийн булш, дурсгалд малтлага хийж эртний олдвор илрүүллээ.

Хүннүгийн үеийн булш, дурсгалаас эртний шаазан ваар, 14 настай хүүхдийн булшнаас модон сав, малын яс, хүний дунд чөмөгний яс олдсон байна.

Модон хайрцаг болон шаазан ваарыг гадаадын шинжилгээний төвд нарийн шинжилгээнд хүргүүлэхээр төлөвлөж байгаа бөгөөд шинжилгээний дүнд үндэслэн аймгийн музейд хүлээлгэн өгөхөөр тогтсон гэж судалгааны баг мэдэгдэв. Эдгээр олдвороор дамжуулан эртний Умард Хүннүгийн монголчуудын ахуй амьдрал, түүхийн өвөрмөц шинжийг тогтоохыг зорьж байгааг профессор Жу Нам Чёл онцолжээ.

Дундговь аймгийн музей, МУИС-ийн Нүүдэлчдийн археологийн хүрээлэн, ШУТИС-ийн Археологи, өв соёлын судалгааны төвийн хамтарсан “УМАРД ГОВИЙН ХҮННҮЧҮҮД” археологийн судалгааны төсөл Дундговь аймгийн Сайнцагаан сумын Суман уулын дурсгалт газарт амжилттай үргэлжилж байна.

Төслийн хүрээнд Хүннүгийн үеийн археологийн дурсгалын малтлага, судалгааны ажлыг гүйцэтгэж байгаа бөгөөд судалгааны үр дүнд Дундговь нутгийн түүх, соёлын өвийг шинжлэх ухааны үндэслэлтэйгээр судлах, хамгаалах, судалгааны эргэлтэд оруулахад чухал ач холбогдолтой юм.