Монгол Улс Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг 8 дугаар сарын 17-28-нд Улаанбаатар хотод зохион байгуулсан. Энэ хурлын үр дүн, тайланг БОУАӨ-ийн сайд Ц.Сандаг-Очир, Засгийн газрын Хэвлэл, мэдээлэл олон нийттэй харилцах газрын дарга Б.Төгсбаяр, нийслэлийн ЗДТГ-ын ерөнхий менежер бөгөөд Захирагчийн ажлын албаны дарга Ч.Мэндбаяр, СОР17 хурлыг зохион байгуулах үндэсний хорооны Ажлын албаны дарга Б.Гантуяа, “COP17 Хөрөнгө оруулалт, бүтээн байгуулалтын газар” ОНӨААТҮГ-ын захирал Б.Баттулга нар өнөөдөр сэтгүүлчдэд мэдээллээ.
Монгол Улс 2022 оноос эхэлсэн уг хуралд бэлтгэжээ. 23 хүний бүрэлдэхүүнтэй хэлэлцээ хийх баг бэлтгэж, хурлаар хэлэлцсэн 34 шийдвэрийн үйл явцад идэвхтэй оролцсон гэнэ.
БОУАӨ-ийн сайд Ц.Сандаг-Очир:
-Улаанбаатарын тунхаглал болон Монгол Улсын дэвшүүлсэн “Тал хээрийн төлөвлөгөө” олон улсын дэмжлэг авч, бэлчээр, ус, газар, малчдын амьжиргаа, уур амьсгалын асуудлыг уялдуулсан шинэ бодлогын чиглэл бий болголоо. Тус төлөвлөгөөний хүрээнд “Бэлчээрийн тэргүүлэх санаачилга”, “Ус ба газрын нэгдсэн менежмент”, “Байгальд суурилсан дэд бүтцийн санаачилга”-ыг эхлүүлсэн нь цөлжилтийг бууруулж, уур амьсгалын өөрчлөлтийн эсрэг оруулж буй бодит алхам боллоо.
Монгол Улсын санаачилгаар НҮБ-аас 2026 оныг “Бэлчээр ба нүүдлийн мал аж ахуй эрхлэгчдийн олон улсын жил” болгон зарласан нь манай улсын санаачилга бодитоор хэрэгжихэд томоохон түлхэц болсон. “COP17-д дэлхийн 196 улс, олон улсын байгууллага, хувийн хэвшил, иргэний нийгмийн төлөөлөл оролцож, нийт 20 мянга гаруй зочин, төлөөлөгч оролцохоор Улаанбаатар хүрэлцэн ирсэн. Цэнхэр болон Ногоон бүсэд нийт 756 арга хэмжээ, хэлэлцүүлэг зохион байгуулагдсан бөгөөд нийт төрийн байгууллага, нийслэл, хувийн хэвшил, сайн дурынхан, оюутан залуусын 3,000 гаруй хүн газар дээр нь ажиллалаа.
Хэвлэл мэдээллийн байгууллагын оролцоо өндөр байсан. 789 хэвлэл мэдээллийн төлөөлөгч мэдээ, мэдээлэл бэлтгэсэн байна. Аюулгүй байдал, эрүүл мэндийн чиглэлд 1,000 гаруй алба хаагч ажиллаж, эрүүл мэндийн байгууллагууд 773 хүнд тусламж үйлчилгээ үзүүлсэн.
Хурлыг зохион байгуулахтай холбоотой тоног төхөөрөмж, барилга байгууламжийн зардалд 2026, 2027 оны улсын төсвийн хөрөнгө оруулалтаар нийт 217.1 тэрбум төгрөг тусгасан байсан. Үүнээс 156.3 тэрбум төгрөгийн гүйцэтгэл гарч, 60.8 тэрбум төгрөгийн төсөв хэмнэсэн.
Мөн хувийн хэвшил болон олон улсын түншүүдээс нийт 7.4 тэрбум төгрөгийн хандив, дэмжлэг төвлөрсөн. Энэ нь улсын төсвийн ачааллыг бууруулахад бодит хувь нэмэр болсон.
Байгаль орчин, уур амьсгалын өөрчлөлтийн яамнаас СОР17 хуралтай холбоотой санхүүжилт, төсөвтэй холбоотой дэлгэрэнгүй мэдээллийг цахим хуудастаа байршуулсан. Хэвлэл мэдээлэл болон иргэдийн зүгээс уг мэдээллийг нээлтэй үзэж сонирхож болно. Тухайлбал, дэлхийн хэмжээнд газрын доройтол, цөлжилттэй тэмцэх чиглэлээр нийт 18 тэрбум ам.долларын санхүүжилтийн амлалт зарлагдсан.
Үүний дотор Монгол Улсаас дэвшүүлсэн “Тал хээрийн төлөвлөгөө”-ний “Бэлчээрийн тэргүүлэх санаачилга”-ын хүрээнд нийт дэлхийн улс орнуудын 45 бэлчээр, экосистемийн төсөлд 1.2 тэрбум ам.долларын хөрөнгө оруулалт хийх боломж бүрдсэн нь бэлчээрийн асуудлыг дэлхийн анхаарлын төвд оруулж чадсны тод илрэл гэж НҮБ-аас тодотгосон.
Монгол Улсад шууд хамаарах гэрээ, санамж бичиг, санхүүжилтийн амлалтыг нэгтгэвэл ойролцоогоор 1.46 тэрбум ам.доллар буюу таван их наяд төгрөгийн хөрөнгө оруулалтын боломж бий болсон байна. Энэ нь өнөөдөр эсвэл маргааш төсөвт шууд орж ирсэн санхүүжилт биш.
Харин богино болон урт хугацаандаа эдгээр амлалт, гэрээ, хэлэлцээрийг хөрөнгө оруулалт болгон хэрэгжүүлэх санхүүжилтийн боломж гэдгийг тэрбээр онцлоод Монгол Улс COP18 хүртэл буюу ирэх 2028 он хүртэл хоёр жилийн хугацаанд СОР17 хурлын даргалагч орны үүргээ үргэлжлүүлж, тус хурлаас болсон боломжуудыг бодит төсөл, бодит хөрөнгө оруулалт болгоход анхаарч ажиллана.
Үндэсний цэцэрлэгт хүрээлэнд нийт 12.3 га ногоон байгууламж, 640 автомашины зогсоол, инженерийн дэд бүтэц зэрэг нь НЗДТГ-ын өмчлөлд үлдэнэ. Эдгээрийг цаашид хүүхэд, залуус, гэр бүлүүдийн амралт, спорт, чөлөөт цагийн зориулалттай нээлттэй орчин болгон хөгжүүлэх асуудлыг НЗДТГ хариуцаж ажиллана.