Америкийн рок хамтлаг My Chemical Romance-ийн 2006 онд гаргасан “The Black Parade” цомгийн 20 жилийн ойн тусгай хувилбар Billboard-ын цомгийн жагсаалтыг тэргүүлжээ. Ингэснээр хамтлаг олон жилийн өмнө гаргасан бүтээлээрээ хөгжмийн зах зээлд дахин хүчтэй эргэн ирж байгааг харууллаа.

АНУ-ын Billboard 200 жагсаалтын 2026 оны арваннэгдүгээр сарын 7-ны дугаарт тус цомог 139 дүгээр байрнаас шууд нэгдүгээр байрт дэвшсэн байна. Энэ нь My Chemical Romance хамтлагийн Billboard 200 жагсаалтыг анх удаа тэргүүлсэн тохиолдол юм. Цомог анх 2006 онд худалдаанд гарахдаа хоёрдугаар байрт бичигдэж, тухайн үед “Hannah Montana” цувралын дууны цомгийн ард орж байжээ.

Цомгийн 20 жилийн ойн тусгай хувилбарт өмнөх хувилбарт байгаагүй зургаан дуу нэмсэн бөгөөд пянз, CD, хуурцаг зэрэг 20 гаруй төрлөөр худалдаалжээ. Аравдугаар сарын 29-нд дууссан долоо хоногт АНУ-д нийт 78 мянган цомогтой дүйцэхүйц нэгж борлуулсан байна. Үүний 68 мянга нь биет цомгийн борлуулалт байсан бөгөөд 42 мянган ширхэгийг пянз эзэлжээ.

Ингэснээр “The Black Parade” цомог худалдаанд гарснаасаа хойш 20 жилийн дараа Billboard 200-ийг тэргүүлсэн анхны бүтээл болж, жагсаалтын түүхэн дэх нэгдүгээр байрт хүрэх хамгийн урт хугацааны рекордыг тогтоолоо. Өмнөх рекорд кантри дуучин Тоби Кийтийн “35 Biggest Hits” цомогт хамаарч байсан бөгөөд тэр цомог анх гарснаасаа хойш бараг 16 жилийн дараа тэргүүлж байв.