Ичээндээ ороогүй баавгай өчигдөр Увс аймгийн Түргэн сумын нутаг дахь Шивэр гэдэг газарт үзэгджээ. Уг баавгай анх Тэс сумын Ханжит гэх газарт сарын өмнө харагдсан юм. Уг баавгайг барьж, ойд нь буцаах эсвэл суурин газарт ойртуулахгүй байхаар тус аймгийн Байгаль орчны газар тэргүүтэй мэргэжлийн байгууллагууд хамтран сар орчим хөөцөлджээ. Уг баавгай Тэс, Түргэн, Сагил сумын нутгаар сар идэш хайн тэнүүчилжээ.

Ингээд Сагил сумын Өндөрмод гэдэг газраас байгаль хамгаалагч үхсэн бамбарууш олсон аж. Тэндээс том баавгайн ул мөр олджээ. Түүний мөрийг хөөж явсаар амьд амьтан баригчаар барьсан байна. Өнөөдөр уг баавгайг Хан Хэнтийн УТХГХЗ-нд хүлээлгэн өгөхөөр тээвэрлэж байна. Хавар болтол түүнийг тэжээж байгаад байгальд буцаан тавих юм байна.