Пакистан улсын нийслэл Исламабад хотын, төрийн өмчит Анагаахын Шинжлэх Ухааны Хүрээлэн (PIMS)-гийн Эх, хүүхдийн эрүүл мэндийн тасагт 8 дугаар сарын 26-ны өглөө гал гарч, 14 нярай амиа алдсан тухай “Ройтерс” агентлаг мэдээллээ. Гал 3 дугаар давхарт байрлах Нярайн тасагт өглөөний 07:00 цагийн орчимд гарчээ.

Галын шалтгааныг урьдчилсан байдлаар агааржуулагч төхөөрөмж дэлбэрсэн, техник гэмтсэнтэй холбоотой гэж тус улсын Эрүүл мэндийн сайд Мустафа Камал мэдээлсэн байна. Нярайн тасагт хүчилтөрөгчийн агууламж өндөр байсан нь гал хурдан тархахад нөлөөлсөн байж болзошгүй аж.

Тухайн үед тасагт 15, 16 нярай байсан гэх зөрүүтэй мэдээлэл гарчээ. Галаас ганцхан хүүхдийг аварч чадсан байна. Утаа маш богино хугацаанд тасгийг бүрхэж, зарим нярай инкубаторт, зарим нь хүчилтөрөгчийн аппараттай байсан нь аврах ажиллагааг хүндрүүлжээ.

Гал түймрийн алба болон аврах багийнхан цонхоор нэвтэрч, шат ашиглан хүмүүсийг гаргажээ. Эхийн тасаг, Хүүхдийн тасагт байсан эмэгтэйчүүд, хүүхдүүдийг мөн яаралтай нүүлгэн шилжүүлсэн байна. Гал зөвхөн Нярайн тасагт гарсан тул эмнэлгийн бусад хэсэгт ноцтой хохирол учраагүй аж.

Энэ эмгэнэлт явдлын дараа эмнэлгийн галын аюулгүй байдал, яаралтай тусламжийн бэлэн байдалтай холбоотой ноцтой асуултууд гарч ирээд байна. Хохирогчдын ар гэрийн зарим хүн “Нярайн тасгийн хаалга түгжээтэй байсан. Гал гарах үед ажилтан хангалттай байгаагүй” гэж мэдэгдсэн байна. Эдгээр нь одоогоор ар гэрийнхний мэдүүлэг. Үүнийг мөрдөн шалгаж, тогтоох шаардлагатай ажээ.

Пакистаны Ерөнхий сайд Шехбаз Шариф уг эмгэнэлт явдлыг шалгахыг үүрэг болгож, хариуцлага алдсан этгээдүүдийг тогтоон, зохих арга хэмжээ авахыг даалгажээ. Түүнчлэн Эрүүл мэндийн нарийн бичгийн дарга Аслам Гауриг албан тушаалаас нь түдгэлзүүлж, хэргийн шалтгаан болон эмнэлгийн аюулгүй байдлыг шалгах комисс байгуулсан байна.

Энэхүү осол Пакистанд сүүлийн жилүүдэд гарсан хамгийн ноцтой гамшгийн нэг болов. Тус улсын төрийн эмнэлгүүд хөрөнгө, тоног төхөөрөмжийн хомсдол, ачаалал ихтэй байдал болон менежментийн асуудлаар өмнө нь ч шүүмжлэлд өртөж байв.