Украин улс Британийн үйлдвэрлэсэн алсын тусгалт пуужинг ашиглан, Оросын нутаг дэвсгэрт довтолсоор байвал Их Британийн цэргийн байгууламжуудыг Украинд төдийгүй бусад газарт ч онилж болзошгүй гэж Москва анхаарууллаа. ОХУ-ын Гадаад хэргийн яамны хэвлэлийн төлөөлөгч Мария Захарова энэ мэдэгдлийг хийж, “Украины дайнд Лондон улам гүнзгий татагдан орж болзошгүй” хэмээн мэдэгджээ.

Украин Британийн зэвсгийг ашиглан, Оросын нутаг дэвсгэрт цохилт өгсөн тохиолдолд Москва хариу арга хэмжээ авах эрхтэй гэж тэр үзэж байгаа аж. Энэ нь Оросоос Их Британид чиглэсэн хамгийн хатуу анхааруулгын нэг болов.

Үүний зэрэгцээ Оросын пуужин, дроны довтолгоо Украины Киев болон бусад хотын эрчим хүч, аж үйлдвэрийн болон боомтын дэд бүтцэд хохирол учруулсан талаар Украины эрх баригчид мэдээлжээ. Их Британийн Засгийн газар Украинд үзүүлж буй дэмжлэгээ үргэлжлүүлэх бөгөөд тус улсын аюулгүй байдлын асуудлаар Киевтэй хамт байна гэдгээ мэдэгдсэн байна.