Гадаад улсаас Монгол Улсад суугаа ЭСЯ-дын дипломат дугаартай машин унасан хүмүүс зам, тээврийн осол гаргах боллоо. Тэдэнд ямар хариуцлага тооцсоноо, ер нь хариуцлага тооцсон эсэхээ Тээврийн цагдаагийн алба олон нийтэд тэр бүр мэдээлдэггүй.

Нийслэлийн Сүхбаатар дүүргийн I хорооны нутаг, ЮНЕСКО-гийн гудамжинд өнөө өглөө 08:40 цагийн үед АНУ-ын ЭСЯ-нд бүртгэлтэй, дипломат дугаартай машин нэгэн машины араас мөргөжээ. АНУ-ын ЭСЯ-ны машин олны мэдэхээр “Натур”-ын замд “Контенинтал” зочид буудлын урдах авто замын үргэлжилсэн цагаан шугам давсан аж.

Энэтхэгийн ЭСЯ-ны жолооч ДК1505 дугаартай машинаараа 2024.09.09-нд осол гаргаад, зугтсан байдаг. Тэгвэл ОХУ-ын ЭСЯ-ны цэргийн аттеше 2024.08.07-нд согтуудаа дипломат дугаартай машинаа жолоодож яваад, нийслэлийн Баянзүрх дүүргийн нутаг Сансарын тойрог орчимд осол гаргасан юм. Ингээд зогсоогүй гудамжинд ил бие зассан.

Цагдаагийн байгууллагаас уг ослыг шалгасан ч хариуцлага тооцож чадаагүй. Учир нь ОХУ-ын ЭСЯ-ны цэргийн аттеше П.В.Петрунин халдашгүй эрх эдэлдэг аж. Тиймээс түүнд Монгол Улс хуулийн хариуцлага тооцох боломжгүй, ЭСЯ нь ажилтандаа хариуцлага тооцохоор болсон юм байна.