АНУ-ын ерөнхийлөгч Д.Трампын өнгөрсөн сард зарласан, ган болон хөнгөнцагааны импортод 25 хувийн татвар ногдуулах шийдвэр төлөвлөгөөний дагуу энэ долоо хоногийн лхагва гарагаас хүчин төгөлдөр үйлчилж эхлэхээр болсныг АНУ-ын худалдаа, аж үйлдвэрийн сайд Ховард Лутник мэдээлжээ.

Энэ талаар Ховард Лутник өнгөрсөн ням гарагт NBC News мэдээллийн хөтөлбөрт оролцохдоо мэдээлсэн байна.

Уг импортын тарифын нэмэгдэл нь зөвхөн Канад, Мексик, Хятад зэрэг ган, хөнгөнцагааны томоохон экспортлогчдоос гадна Өмнөд Солонгос зэрэг бусад экспортлогч улс орнуудад ч хамааралтай юм.

Түүнчлэн ерөнхийлөгч Трампын засаг захиргаа ирэх сарын 2-ны өдрөөс эхлэн Канадын мод болон сүү, сүүн бүтээгдэхүүний импортод харилцан тэгш тариф тогтоохоор болоод байгаа төлөвлөгөөний талаар тайлбарлаж, энэ талаарх шийдвэрээ ерөнхийлөгч 4-р сарын эхэн хүртэл “харзнаж” байгаад гаргана гэдгийг Ховард Лутник онцолсон байна.

Зөвхөн Канад гэлтгүй 4-р сарын 2-ны өдөр Вашингтоны зүгээс дэлхийн бүх улс орнуудтай худалдааны харилцан тэгш тариф тогтоохоор болоод байгаа билээ. Ховард Лутник ерөнхийлөгч Трампын засаг захиргааны тарифын бодлогыг өмгөөлж, энэхүү бодлогын үр дүнд Америкт аж үйлдвэрлэлийг буцааж авчрах болно гэжээ.

Харин энэ үеэр БНХАУ Америкийн ХАА болон МАА-н гаралтай бүтээгдэхүүнд нэмэлт тариф ногдуулж, Америкийн эсрэг хоёр дахь удаагаа тарифын хариу арга хэмжээ аваад байна.

Анх Трампын засаг захиргаа өнгөрөгч сард Хятадын бүхий л импортод нэмэлт 10 хувийн татвар, өнгөрсөн долоо хоногт ахин 10 хувийн татвар нэмж ногдуулсан бол БНХАУ-ын зүгээс шууд хариу арга хэмжээ авч, АНУ-ын нүүрс болон шингэрүүлсэн байгалийн хийн импортод 15 хувийн, түүхий газрын тос, ХАА-н хүнд машин техник болон ачааны машинд 10 хувийн нэмэлт татвар ногдуулсан юм.

Өнгөрсөн долоо хоногт Бээжингийн зүгээс Америкийн 29 төрлийн импортын бараа бүтээгдэхүүнд 15 хувийн, өөр бусад 711 төрлийн бараа бүтээгдэхүүнд 10 хувийн нэмэлт татвар ногдуулахаа зарлаж, дээрх шийдвэр даваа гарагаас хүчин төгөлдөр үйлчилж эхлээд байна.