Энэ оны эхээр АНУ-ын нийслэл Вашингтон хотод иргэний агаарын зорчигч тээврийн онгоц цэргийн нисдэг тэрэгтэй агаарт мөргөлдөн, Потомак голын усанд унаж осолдон, 67 хүн амь үрэгдсэн аймшигтай ослын шалтгааныг тогтоох мөрдөн шалгах ажлыг гүйцэтгэсэн албаны хүмүүс Рейганы үндэсний нисэх онгоцны буудлын ойролцоо нисдэг тэрэг хөөргөхийг хориглох саналыг дэвшүүлсэн байна.
АНУ-ын Үндэсний зам тээврийн аюулгүй байдлын зөвлөлийн зүгээс эрх баригчдад хандан гаргасан саналдаа нисдэг тэргэнд зориулан одоо ашиглаж байгаа 15 болон 33 гэсэн хөөрөх замаас өөр, тусдаа шинэ хөөрөх зам талбай гаргахыг уриалжээ.
Үндэсний зам тээврийн аюулгүй байдлын зөвлөлийн тэргүүн Женнифер Хоменди мэдэгдэлдээ нисдэг тэрэг болон онгоцны хөөрөх зам талбайг салгаж холдуулах зайлшгүй шаардлагатай, эс бөгөөс ахин агаарт мөргөлдөх ийм осол гарах магадлал өндөр гэдгийг онцолсон байна.
Тус зөвлөлийн зүгээс ослын шалтгааны талаарх урьдчилсан дүгнэлтийг гаргахдаа ашигласан дата мэдээлэлд хийсэн дүн шинжилгээний дагуу бол 2011-2024 оны хооронд сар бүр дор хаяж нэг удаа агаарт онгоц болон нисдэг тэрэг мөргөлдөх аюулын дохио бүртгэгдэж байсныг Женнифер Хоменди онцолж, энэ асуудал дээр яаралтай арга хэмжээ авахыг тодотгожээ.
Мөн тэрээр агаарын зохицуулалт, удирдлагын төвүүдэд ч асуудал байгаа талаар ярьсан байна. Агаарын зохицуулалтын удирдлагын төвөөс яг осол болохын өмнө нисдэг тэргэнд иргэний агаарын тээврийн онгоцтой мөргөлдөх аюултай байгааг анхааруулсан бичлэг хадгалагдсан байдаг байна.
АНУ-ын нийслэл Вашингтон хотын захад байрладаг Рейганы үндэсний нисэх онгоцны буудал нь 98 чиглэлд өдөрт 400 орчим нислэгтэй байдаг АНУ-ын хамгийн хөл хөдөлгөөн ихтэй, завгүй нисэх онгоцны буудлын нэг юм.