Нийслэлийн Сонгинохайрхан дүүргийн ерөнхий боловсролын нэгэн сургуулийн албан тушаалтан И.М эрх мэдэл, албан тушаалаа урвуулан ашиглаж, багш нарын ажилласан цаг дээр илүү цаг нэмж бичдэг байжээ. Тэр нэмж бичсэн цагийн орлогыг өөрийнхөө дансаар шилжүүлэн авдаг аж. Мөн өөр сургууль руу шилжсэн сурагчдын сургалтын төлбөрийг өөрийнхөө дансанд шилжүүлэн авчээ.

Энэ хэргийг АТГ шалган тогтоож, шүүхэд шилжүүлэх саналтайгаар нийслэлийн Прокурорын газарт шилжүүлжээ. Улсын яллагч эл хэрэгт Эрүүгийн хуулийн 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/-т зааснаар яллах дүгнэлт үйлдэн, Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд шилжүүллээ.

Нийслэлийн Прокурорын газар 3 дугаар сарын 10-14-ний хооронд хэрэг бүртгэлтийн 50153, мөрдөн байцаалтын 2892 хэрэгт хяналт тавьж, эрүүгийн 253 хэрэгт яллах дүгнэлт үйлдэн шүүхэд шилжүүллээ. Үүний 6 нь авлига, албан тушаалын хэрэг байв.