УНТЭ-ийн Бөөр шилжүүлэн суулгах мэс заслын багийн эмч Д.Баян-Өндөр:

-Донорын хуулийг анх 2000 онд баталсан. Үүнээс хойш хоёр удаа шинэчилсэн. Эл хуулийг шинэчлэн батлуулахад П.Батчулуун эмчийн баг манлайлан оролцож байсан. Одоо Донорын тухай хуулийн шинэчилсэн найруулгын хэлэлцүүлэг явж буй. Та бүхэн үзвэл саналаа өгөх бүрэн эрхтэй.

Шинэчлэн найруулсан Донорын тухай хуулийн 23.1-д “Амьгүй донорын гэр бүлд нийгмийн даатгалын шимтгэл төлсөн эсэхтэй хамааралгүйгээр хөдөлмөрийн хөлсний доод хэмжээг 10 дахин нэмэгдүүлсэн тэтгэмж олгоно” гэсэн заалт орж буй. Одоо үүсээд байгаа маргаан үүнтэй холбоотой. Энэ тэтгэмжийг олгоогүй учраас ойлголцлын зөрүү гарсан.

Эмнэлгийн мэргэжилтнүүд өдөр болгон өвчтөнтэй уулздаг. Тухайн хүнд хийх гэж байгаа эмчилгээний талаар зөвшөөрөл авдаг. Ямар эмчилгээг ямар аргаар яаж хийх үү. Ямар хүндрэл гарах уу. Цаашдаа яах вэ гэдгээ тайлбарлаж өгөөд, хоёр тал ойлголцож, 3-аас дээш хүн гарын үсгээ зурдаг. Энэ зөвшөөрлийн хуудсыг мэс засал хийхэд, мэдээгүйжүүлэлт, цус сэлбэхэд гээд бүх процесст авна. Гэтэл өнөөдөр гарын үсгээ зуруулсан, бүрэн бөглөгдсөн зөвшөөрлийн хуудас эмчийгээ хамгаалахгүй байна.

Эрүүл мэндийн салбар 100 жил хөгжсөн байна. Бид эрхтэн шилжүүлэн суулгах гээд 30-аад жил ажиллаж байна. Эрхтэн суулгуулж байгаа хүмүүсийнхээ эрх ашгийн төлөө, тэр хүмүүсийн дархлаа дарангуйлах эмийг үнэгүй олгоход, мэс заслыг нь төлбөргүй болгоход бид хичээн ажилласан. Харамсалтай нь бид өөрсдийнхөө эрх ашгийг ерөөсөө бодоогүй юм байна. Шинжлэх ухаан, технологи хөгжөөд, энэ нөхцөлд хүрлээ ч гэсэн бид эргээд асуудалд орохоор ийм байдал үүсчихсэн байгаа юм байна.

Эмчийн эрх зүйн байдал сул байна. Өчигдөр Эрүүл мэндийн сайдтай уулзсан. Эмч, мэргэжилтний эрх зүйн байдлын тухай хуулийн төслийг 11 дүгээр сараас хойш яриад явж байгаа юм. 20 хэдэн зүйл ангитай хууль батлагдах гэж байгаа юм байна. Энэ хууль гарахын өмнө ийм хэрэг болсонд харамсаж байна.