Ирландын загвар зохион бүтээгч Жонатан Андерсон Испанийн тансаг зэрэглэлийн хувцас загварын алдарт Loewe брэндийн уран бүтээл эрхэлсэн захирлын албан тушаалаа өгсөн байна. Тэрээр уг албан тушаалд сүүлийн 11 жилийн турш ажилласныхаа дараагаар дээрх шийдвэрийг гаргасан байна.
Жонатан Андерсон өөрийн Инстаграм хуудсандаа “Миний бүхий л галзуу санаануудыг үргэлж дэмжиж ажилладаг байсан, гайхалтай авьяас, уран сэтгэмж, ур чадвар, тууштай байдал, нөөц бололцоо бүхий хүмүүсээр хүрээлүүлж байсан би их азтай хүн. Миний ажиллах хугацаан дуусч байгаа хэдий ч Loewe брэндийн түүх цаашид олон жил үргэлжлэх болно” хэмээн бичжээ.
Loewe брэндийн зүгээс гаргасан мэдэгдэлд Жонатан Андерсоны удирлаган дор тус брэнд “гайхалтай өсөлтийг үзүүлж, орчин үеийн тансаг зэрэглэлийн хувцас загварын салбартаа тэргүүлэгчдийн нэг болж чадсан” гэжээ. Тус брэндийн дотоод бүтэц, зохион байгуулалт, хүний нөөцөд томоохон өөрчлөлт шинэчлэлт хийгдэж байгаатай холбоотойгоор ийнхүү Жонатан Андерсон албан тушаалаасаа буусан байна.
Хэдийгээр Ж.Андерсон түүний дараагийн алхам юу байх талаар мэдээлээгүй ч загварын салбарын хэвлэл мэдээллийн хэрэгслүүд түүний уран бүтээлийн замналаа Christian Dior брэндэд орж үргэлжлүүлэх тухай бичиж байна. Тэрээр мөн өөрийн гэсэн JW Anderson хэмээх хувцас загварын брэндтэй билээ.
Өнгөрсөн 1-р сард Британийн загвар зохион бүтээгч Ким Жонс Christian Dior брэндийн эрэгтэй хувцас загварын уран бүтээл эрхэлсэн захирлын албанаас буусан бөгөөд Жонатан Андерсоныг уг албан тушаалд очиж магадгүй байгаа талаар олон хэвлэлүүд бичээд байна.
Ж.Андерсон Лондоны загварын коллежид суралцаж төгссөн бөгөөд уран бүтээлийн гараагаа Prada брэндийн маркетингийн хэлтсээс эхэлж байжээ. Тэрээр 2008 онд өөрийн нэрийн брэндийг үүсгэн байгуулж байсан бол Loewe-д 2013 оноос ажиллаж эхэлсэн байна. Ж.Андерсон нь чөлөөндөө гарсан ирландын регбигийн багийн ахлагч Вилли Андерсоны хүү юм. Тэрээр өөрийн гэсэн өвөрмөц, жендерт баригддаггүй, хувцас загварын шинэлэг, инновацлаг хэв маягаараа алдартай бөгөөд салбарын олон шилдэг шагналуудыг хүртэж байснаас хамгийн сүүлд өнгөрсөн оны 12-р сард зохиогдсон 2024 оны Fashion Awards шагнал гардуулах ёслолоос “Оны шилдэг загвар зохион бүтээгч” шагналыг хүртсэн юм.