Тангараг өргөөд удаагүй байгаа Канадын шинэ Ерөнхий сайд Марк Карни ирэх 4-р сард парламентын ээлжит бус сонгууль явуулахаар зарласан байна. Канадын эрх баригч Либерал намын дарга, Ерөнхий сайд Марк Карни ням гарагт хийсэн албан ёсны мэдэгдэлдээ Их Британийн эзэн хаан III Чарльзын Канад улс дахь бие төлөөлөгчид парламентыг тараах хүсэлт гаргаж, зөвшөөрсөн болохыг хэлээд, парламентын сонгуулийг 4-р сарын 28-ны өдөр явуулахаар тогтсоныг мэдэгджээ.
Ийнхүү энэ оны 10-р сард явагдах товтой байсан Канадын парламентын сонгуулийг хугацаанаас нь өмнө зохион байгуулахаар боллоо. Энэ явдлыг тэрээр АНУ-ын Ерөнхийлөгчийн зүгээс ирж буй олон тооны аюул заналхийлэлтэй холбон тайлбарлаж, түүний намын сонгуулийн сурталчилгааны кампанит ажил ч мөн АНУ-ын эсрэг авч хэрэгжүүлэх арга хэмжээ бүхий мөрийн хөтөлбөрүүд дээр анхаарлаа хандуулах болно гэжээ.
Тэрээр “Өнөөдөр бид АНУ-ын Ерөнхийлөгч Д.Трампын үндэслэлгүй худалдааны үйл ажиллагаа болон манай улсын тусгаар тогтнолд заналхийлж буй үйлдлүүдээс шалтгаалан түүхэн дэх хамгийн хямралтай цаг үетэй нүүр тулж байна” гэсэн байна.
АНУ-ын Ерөнхийлөгч Д.Трамп хойд хөрш болох Канад улсын хил болон тусгаар тогтнолыг удаа дараа үгүйсгэж, АНУ-ын 51 дэх муж болж нэгдэх тухай мэдэгдсээр байгаагаас гадна Канадын эсрэг импортын 25 хувийн тарифыг нэмээд байгаа нь ирэх сарын 2-ны өдрөөс хэрэгжиж эхлэх юм.
Парламентын сонгуулийн тов гарснаар Канадын бүхий л улс төрийн намууд сонгуулийн сурталчилгааны кампанит ажилдаа ханцуй шамлан орж эхлээд байна. Ээлжит бус сонгуульд аль ч нам ялсан холбооны Засгийн газарт томоохон өөрчлөлт орох нь тодорхой байгаа талаар ажиглагчид хэлж байна.
Консерватив нам, Шинэ ардчилсан нам, Блок Квебекуа зэрэг сөрөг хүчний томоохон нам сүүлийн 10 гаруй жил Либерал намын эрх барьсан төр засагт өөрчлөлт, шинэчлэлт авчрах асуудлыг мөн онцолж байна.
Ээлжит бус парламентын сонгуулийг зарлаж, парламентыг тараахаас өмнө парламентын доод танхим буюу төлөөлөгчдийн танхимд эрх баригч Либерал нам 153 суудалтай, сөрөг хүчний Консерватив нам 120 суудалтай, Блок Квебекуа нам 33 суудалтай, Шинэ ардчилсан нам 24 суудалтай, Ногоон нам 2 суудалтай байсан байна.