БНАСАУ-ын удирдагч Ким Жон Уныг ОХУ-д төрийн айлчлал хийхээр төлөвлөж байгаа талаар  Кремлийн хэвлэлийн төлөөлөгч Дмитрий Песков сэтгүүлчдэд мэдээлсэн байна.

Өнгөрсөн долоо хоногт ОХУ-ын Аюулгүй байдлын зөвлөлийн нарийн бичгийн дарга Сергей Шойгу Умард Солонгос улсад айлчилж, тус улсын удирдагч Ким Жон Унтай уулзсан бөгөөд Сергей Шойгу уулзалтынхаа үеэр Ким Жон Уны ОХУ-д хийх төрийн айлчлалын асуудлаар хэлэлцсэн үү гэх сэтгүүлчийн асуултанд Д.Песков хариулахдаа айлчлалын төлөвлөгөө, зохицуулалтын ажлууд явагдаж байгааг хэлсэн байна.

Тэрээр хэлэхдээ, Ким Жон Унд ОХУ-д айлчлахыг урьсан “хүчинтэй” урилга байгаа ба түүний айлчлалын товыг хоёр улсын дипломат шугамаар дамжуулан тогтоох болно гэжээ. 

Өнгөрсөн оны 6-р сард ОХУ-ын ерөнхийлөгч В.Путин БНАСАУ-д төрийн айлчлал хийж, Пхеньян хотноо Ким Жон Унтай уулзалт хийж байсан. Тухайн үед В.Путин хоёр улсын удирдагчдын ээлжит чуулга уулзалт Москва хотноо зохион байгуулагдана гэж найдаж байна хэмээн хэлж байсан юм.

Харин ОХУ-ын Аюулгүй байдлын зөвлөлийн нарийн бичгийн дарга С.Шойгу өнгөрсөн долоо хоногт Ким Жон Унтай уулзах үеэрээ ОХУ-ын ерөнхийлөгч В.Путины захидлыг гардуулан өгсөн байна. Уг захидалд В.Путин БНАСАУ-ын удирдагчийг ОХУ-д айлчлахыг ахин урьсан болохыг Оросын дипломат албаны эх сурвалжууд мэдээлжээ.