БНСУ-ын Samsung Electronics компанийн дэд ерөнхийлөгч Хан Жун Хи өнгөрсөн долоо хоногт зүрхний шигдээсийн улмаас 63 насандаа таалал төгссөн байна.

Түүнийг өнгөрсөн долоо хоногийн бямба гарагт зүрхний шигдээс болж, улмаар эмнэлэгт эмчлүүлж байхдаа нас барсан болохыг салбарын эх сурвалжууд мэдээллээ.

1962 онд төрсөн Хан Жун Хи нь зурагт үйлдвэрлэлийн салбарын тэргүүлэх мэргэжилтэн гэдгээрээ алдаршсан хүн байсан бөгөөд түүний удирлага, манлайлал дор Samsung Electronics компани тасралтгүй 19 жилийн турш дэлхийн тэргүүлэх зурагт үйлдвэрлэгч брэнд хэмээх байр суурийг хадгалсан түүхтэй.

Хан Жун Хи анх 1988 онд Samsung Electronics компанийн зурагт хөгжүүлэх багт ажилд орж байсан ба тус компанийн зурагт болон компьютерын дэлгэцийн технологийн хөгжүүлэлтэд голлох чухал үүргийг гүйцэтгэсэн эксперт хүн юм.

Тэрээр 2021 онд Samsung Electronics компанийн дэд ерөнхийлөгчийн албан тушаалд томилогдож, тэр цаг үеэс хойш Samsung-ийн зурагт, гэр ахуйн цахилгаан хэрэгсэл болон ухаалаг гар утасны бизнесүүдийг хариуцдаг Төхөөрөмжийн хэлтсийг удирдан ажилласан ажээ.