Өмнөд Солонгосын нийслэл Сөүл хотын Гандун дүүргийн автозам дээр гэнэт үүссэн томоохон нүхэнд унасан мотоцикльтой эрэгтэйг эрж хайх, аврах ажиллагааны явцад түүний цогцсыг олсон талаар тус дүүргийн гал сөнөөх албаны зүгээс мэдэгдээд байна.

Зам дээрх томоохон хэмжээний нүх орон нутгийн цагаар даваа гарагийн 18:30 цагийн орчимд үүссэн бөгөөд тухайн гамшиг тохиох үеийн автомашины хяналтын дүрс бичлэг цахим орчинд тархжээ.

Тухайн дүрс бичлэгт зам гэнэт цоорч, үүссэн нүх рүү жижиг мотоцикльтой хүн унаж байгаа нь бичигдсэн байна.

Тэгвэл аврагчид мотоциклийн жолооч эрэгтэйн цогцсыг орон нутгийн цагаар мягмар гарагийн өглөөний 11 цагийн орчимд тухайн үүссэн нүхэн дотроос 50 метрийн гүнээс олсон талаараа мэдээллээ.

Сөүл хотын Гандун дүүргийн гал сөнөөх албаны дарга Ким Чан Соп хохирогчийн цогцос олдохоос өмнөх мэдэгдэлдээ 20 метр гүн, 20 метр өргөнтэй нүх үүсэж, нүхэн дотор 2000 тонн ус болон шорооны холимог байгаа талаар мэдээлж байсан юм.

Амиа алдсан, 30 гаруй насны мотоциклийн жолоочийн нэрийг эрх баригчдын зүгээс хараахан зарлаагүй байна. Мөн замын голд яагаад нүх үүсэх болсон шалтгааныг тодруулаагүй байгаа гэнэ.

Өмнөд Солонгост газарт нүх үүсэх явдал олон тохиолддог бөгөөд нийслэл Сөүл хотын захиргаанаас сүүлд явуулсан судалгааны дүнгээр сүүлийн арван жилийн дотор Сөүл хотод газар нүх үүссэн нийт 223 тохиолдол бүртгэгдсэн байна.

Зөвхөн Өмнөд Солонгос улс ч гэлтгүй Япон, Малайз зэрэг улсуудад газар томоохон хэмжээний нүх үүссэн тохиолдлууд сүүлийн саруудад гарсан билээ.

Газарт нүх үүсэх хамгийн түгээмэл шалтгааны нэг бол газар доорх шохой болон шохойлог чулуулгууд даралтын улмаас нурах явдал юм.